Күршеләр ишегалдында парковка урынын чикләп куйса, нишләргә?

Әгәр йортта яшәүчеләр ишегалдында үз белдеге белән парковка баганалары куеп, аларны чыбык яки чылбыр белән тоташтырса, башка милекчеләргә йортка хезмәт күрсәтүче оешмага мөрәҗәгать итәргә кирәк. Бу хакта «Татар-информ»га юридик фәннәр докторы, Россиянең атказанган юристы Иван Соловьёв сөйләгән.

«Эксплуатацияләүче оешмага (ЖЭК яки ТСЖ) мөрәҗәгать итәргә кирәк — алар бу корылмаларны сүтәргә тиеш. Әгәр бу чара ярдәм итмәсә, территориаль Росреестр бүлекчәсенә шикаять язарга мөмкин. Әгәр баганалар янгын сүндерү машиналарына комачауласа — Гадәттән тыш хәлләр министрлыгына, санитар нормалар бозылса — тиешле хезмәтләргә мөрәҗәгать итәргә була», – диде ул.

Юрист шулай ук кешеләргә мондый киртәләрне үзләре сүтмәскә киңәш итте. Иң элек бозу очрагын фото һәм видео ярдәмендә теркәргә кирәк. Кадрларда машинаның дәүләт номеры, шулай ук гомуми кулланылыштагы территорияне каплап торучы баганалар һәм чылбырлар ачык күренергә тиеш.

Аның сүзләренчә, мондый корылмаларны штраф салынганнан һәм күрсәтмә бирелгәннән соң, кагыйдә бозучы үзе сүтәргә тиеш.

Соловьёв искәрткәнчә, Россия Торак кодексының 36нчы маддәсе нигезендә күпфатирлы йорт урнашкан җир участогы, шул исәптән төзекләндерү һәм яшелләндерү элементлары, барлык милекчеләрнең уртак милке булып тора.

Димәк, уртак милекне киметү бары тик барлык милекчеләр ризалыгы белән генә мөмкин. Әгәр кемдер киртәне үз инициативасы белән куйган икән, ул уртак милекне шәхси максатларда кулланган булып санала, һәм бу законсыз, дип аңлатты белгеч.