Гел соңга калып йөри торган хезмәткәрне эштән җибәрә алалар

Сәбәпсез рәвештә эшкә берничә тапкыр соңга калса, эш бирүче хезмәткәрне эштән азат итәргә хокуклы. Бу хакта «РИА Новости» агентлыгына Приморье краенда кадрлар компаниясе җитәкчесе Ирина Котлярова сөйләгән.

Котлярова аңлатканча, хезмәт килешүенә кул куйганда хезмәткәр үз вазифаларын намус белән башкарырга йөкләмә ала. Алар арасында хезмәт дисциплинасын һәм эш вакыты режимын саклау да бар. Бу таләпләр РФ Хезмәт кодексының 21 маддәсе 2 өлешендә күрсәтелгән. Эшкә кергәндә хезмәткәр имза куеп эчке хезмәт тәртибе кагыйдәләре белән таныша, анда аның эш графигы да билгеләнә.

Котлярова сүзләренчә, эшкә соңга калу хезмәт килешүе шартларын һәм компаниянең эчке кагыйдәләрен бозу булып санала. Мондый очракта эш бирүче хезмәткәрне дисциплинар җаваплылыкка тарта ала һәм РФ Хезмәт кодексының 192 маддәсе нигезендә кисәтү, шелтә белдерү яки эштән азат итү чараларын куллана ала. Ул шулай ук РФ Хезмәт кодексының 81 маддәсе 1 өлеше 5 пункты нигезендә сәбәпсез рәвештә кабатланган соңга калулар эштән азат итүгә китерергә мөмкинлеген билгеләп үтте.

Эксперт сүзләренчә, еш кына җитәкчеләр көчле белгечләрне эшкә ала, әмма вакыт узу белән корпоратив кагыйдәләрне бозу белән очраша. Нәтиҗәдә хезмәт мөнәсәбәтләрен туктату турында карар кабул ителә. Шул ук вакытта, аның әйтүенчә, эмоцияләргә бирелмичә, бары тик Хезмәт кодексы таләпләре кысаларында эш итү мөһим.

Котлярова аңлатканча, хокук бозуны раслау өчен җитәкчедән хезмәт язмасы, хезмәткәрдән язмача аңлатма кирәк. Әгәр ике эш көне эчендә аңлатма бирелмәсә, аны бирүдән баш тарту турында акт төзелә. Бу документларда кабат кагыйдә бозу беренче дисциплинар җәза кулланылганнан соң булганлыгы күренергә тиеш.