Սերժ Սարգսյան․ Մենք կարող ենք և պետք է շարունակենք կառուցել արդյունավետ երկիր
Ցուցադրվեցին հայկական բանակի նորագույն ձեռքբերումները, որոնց մասին վերջին շրջանում լրատվամիջոցները գրում են․ հեռահար՝ «Իսկանդեր» հրթիռային համալիրներ, համազարկային կրակի ռեակտիվ՝ «Սմերչ» համակարգեր, հակաօդային պաշտպանության համար նախատեսված «Բուկ» զենիթահրթիռային համալիրներ և ռադիոէլեկտրոնային պայքարի նորագույն՝ «Ինֆաունա» համակարգ:
Անկախության 25-ամյակի կապակցությամբ հանդես գալով շնորհավորական խոսքով՝ նախագահ Սերժ Սարգսյանը ընդգծեց՝ Հայաստանը վճռական է պաշտպանելու իր ազատությունը․ - «Մենք ընտրել ենք ազատությունը դեռ Հայկ Նահապետի ժամանակ: Մենք հավատարիմ ենք այդ ընտրությանը, որ դեռևս նետուաղեղի ժամանակներում ենք կատարել: Այսօր` 21-րդ դարում զենքերը փոխվել են, բայց չենք փոխվել մենք՝ սեփական ազատությունը պաշտպանելու մեր վճռականությամբ: Վկան այս զորահանդեսն է»:
Հատկանշական է, որ նախագահ Սարգսյանը կարևորեց նաև ազատ հասարակության կայացումը․ - «Մեր քաղաքացիները ևս պետք է ազատ լինեն, որովհետև ազատ մարդն ու ազատ հասարակությունն անհամեմատ ավելի արդյունավետ են գործում: Մենք կարող ենք և պետք է շարունակենք կառուցել արդյունավետ երկիր, որը կպաշտպանի ազատ քաղաքացուն և ազատ հասարակությանը»:
Անդրադառնալով այսօրվա զորահանդեսի ժամանակ ցուցադրված սպառազինությանը՝ Տարածաշրջանային հետազոտությունների կենտրոնի ղեկավար Ռիչարդ Կիրակոսյանը նշեց․ - «Առաջին հերթին՝ ներկայացվածը զսպող նշանակություն ունի: Երբ ոչ ոք և որևէ բան չի կարող կանխել Ադրբեջանի նոր հարձակումը Հայաստանի վրա, սա մի ուղերձ էր Ադրբեջանին՝ զերծ մնալ նման քայլից: Երկրորդ, և, հավանաբար, սա ավելի կարևոր է, ներկայացված սպառազինությունը գերազանցապես ունի պաշտպանական նշանակություն: Այս ամենը ներկայացվեց հարևան երկրներին, աշխարհին հասկացնելու, որ միգուցե Հայաստանը նոր հարձակման սպառնալիքի առջև է, սակայն Հայաստանը սպառնալիք չէ այլ պետություններին: Բացի այդ՝ զորահանդեսը ցույց տվեց, որ ռազմական առումով Հայաստանն ավելի է հզորացել, ավելի արհեստավարժ բանակ ունի և, իհարկե, այս զորահանդեսը ազգային հզորության մի ցուցադրություն էր: Այնուամենայնիվ, այսօր պակասում էր ժողովրդավարության և տնտեսության ուղղություններով ձեռքբերումների ցուցադրությունը, ուր ցույց տալու քիչ բան ունենք»:
Եվ վերջում՝ «Ազատությունը» հետաքրքրվեց պաշտպանության նախարարի պաշտոնակատարի մամուլի քարտուղար Արծրուն Հովհաննիսյանից՝ արդյո՞ք այսօր զորահանդեսի ժամանակ ցուցադրված ողջ սպառազինությունը՝ ներառյալ «Իսկանդեր» հրթիռային համալիրները, պատկանում են Հայաստանի զինված ուժերին: Պատասխանը դրական էր:
«Հայաստանի 2016թ․ զորահանդեսին և ընդհանրապես՝ այլ զորահանդեսներում ցուցադրված տեխնիկան պատկանում է Հայաստանի զինված ուժերին», - ասաց Հովհաննիսյանը՝ ընդգծելով՝ ներառյալ «Իսկանդեր» հրթիռային համալիրները: