20 ача-пăча скверĕ хута ярĕç
Телейлĕ ачалăх çулталăкĕнче Чăваш Енре 20 ача-пăча скверĕ хута яма палăртаççĕ. Çак тĕллеве пурнăçлама çур миллиард тенке яхăн укçа тăкаклĕç. Кун çинчен тĕплĕнрех Правительство çуртĕнче йĕркеленĕ ларура калаçрĕç. Унта «Хăтлă хула таврашĕ» федераци программипе «Пурăнмалли çурт-йĕр тата хула тăрăмĕ» наци проектне еплерех пурнăçланине те тишкерчĕç.
Ача-пăча лапамĕсене сквер евĕр йĕркелеме палăртаççĕ. Вĕсем Шупашкарта, Çĕнĕ Шупашкарта тата республикăн ытти тăрăхĕнче те пулĕç. Чăваш Республикин строительство, архитектура тата пурăнмалли çурт-йĕрпе коммуналлă хуçалăх министерствинчен пĕлтернĕ тăрăх, хальхи вăхăтра вăйă лапамĕсене вырнаçтармалли вырăнсене суйлас енĕпе ĕçлеççĕ.
Кăçал республикăра халăх çӳрекен вырăнсемпе кил-çурт картишĕсене хăтлăх кĕртессине те пысăк тимлĕх уйăрма палăртаççĕ. Пĕтĕмĕшле çулталăк вĕçлениччен 256 объекта çĕнĕ сĕм кĕртмелле. Ларура пĕчĕк тата историллĕ хуласенче хăтлăх кĕртме май паракан Раççей шайĕнчи конкурсра мала тухнисен объекчĕсен проектпа смета докуменчĕсене те пăхса тухрĕç. Çĕнтерӳçĕсем – Пăрачкав тата Çĕрпӳ тăрăхĕсем. Шăпах çак муниципаллă округ ертӳçисем хăйсен проекчĕсем çинчен каласа пачĕç. Вĕсемпе паллашнă май республика ертӳçи Олег Николаев Пăрачкав муниципаллă округĕн администрациĕн пуçлăхĕн Евгений Лебедевăн ĕçĕпе кăмăлсăр пулчĕ. Çавăнпа та ăна вăл проекта çĕнетсе йĕркене кĕртме ыйтрĕ.