Bloomberg–ը Գագիկ Ծառուկյանին «հայկական Թրամփ» է անվանել
ՀՀ նախագահ Սերժ Սարգսյանի իշխող Հանրապետական կուսակցությունը ընտրություններին պայքարելու է չորս այլ կուսակցությունների և չորս դաշինքների հետ համամասնական ներկայացուցչության նոր ու բարդ համակարգի պայմաններում: Խորհրդարան անցնելու համար կուսակցությունները պետք է հաղթահարեն 5 տոկոսանոց շեմը, դաշինքները` 7 տոկոսանոց շեմը:
Նախընտրական արշավի առանձնահատկությունները
Նախընտրական արշավն ուղեկցվում էր «լայնամասշտաբ ընտրակաշառքների» մասին մեղադրանքներով և «այն զգացումով, որ ընտրողների վրա գործադրվելու է ճնշում, և նրանց վախեցնելու են», չնայած միջազգային դիտորդների ներկայությանն ու այն միջոցների, որոնք ձեռնարկվել են ընտրությունների ընթացքում խախտումների կանխման համար։
Երեք միլիոն բնակչություն ունեցող կովկասյան այս հանրապետությունն առավելապես նախագահական իշխանավարումից անցում է կատարում այնպիսի իշխանավարման, որտեղ իշխանությունը կենտրոնացված է լինելու խորհրդարանում և կառավարությունում այն բանից հետո, երբ ՀՀ նախագահ Սարգսյանի երկրորդ և վերջին ժամկետը մոտենա ավարտին։
2015 թ.–ի դեկտեմբերին հանրաքվեի միջոցով հաստատված այս փոփոխություններն ընտրություններին յուրահատուկ նշանակություն են փոխանցում։ Միաժամանակ ընդդիմախոսները պնդում են, որ Սարգսյանը հիմք է պատրաստում, որպեսզի շարունակի ղեկավարել երկիրը որպես վարչապետ։ Նախագահը, սակայն, չի հայտարարել նման մտադրության մասին, չնայած չի էլ բացառել նման հնարավորությունը։
ԱՄՆ–ն և ԵՄՆ–ն չորեքշաբթի հանդես են եկել անսովոր համատեղ հայտարարությամբ` մտահոգություն հայտնելով «ադմինիստրատիվ ռեսուրսի համակարգային օգտագործման կապակցությամբ` որոշ մրցող կուսակցություններին աջակցելու համար»։
Ուժեղ անձնավորություններ
Տարածաշրջանային հետազոտությունների կենտրոնի տնօրեն Ռիչարդ Գիրագոսյանը նշել է, որ ընտրությունները «ավելի շատ ուժեղ անձնավորությունների առճակատում են», քան պայքար կուսակցությունների միջև։ Նա կարծում է, որ ակնհայտ է «լուրջ քաղաքական բանավեճերի պակասը»։
«Հանրապետականներին է» պատկանում ներկա` 5–րդ գումարման խորհրդարանի 131 պատգամավորական մանդատներից 69–ը։ Նոր համակարգով խորհրդարանում կլինի նվազագույնը 101 պատգամավոր։ Եթե կուսակցություններից ոչ մեկը չստանա մանդատների գոնե 50 տոկոսը կամ չկարողանա ստեղծել մեծամասնության կոալիցիա, ապա կանցկացվի ընտրությունների երկրորդ փուլ։ Այս դեպքում երկու առաջատար կուսակցությունները կպայքարեն իրար հետ և կտրամադրվեն լրացուցիչ տեղեր` կայուն մեծամասնություն սահմանելու համար (նվազագույնը 54 տոկոս)` կառավարություն ձևավորելու նպատակով։
Gallup International Association Armenia–ի կողմից մարտի 12–19–ը անցկացված հարցման տվյալներով, 1145 հարցվածների 29 տոկոսն աջակցում է իշխող կուսակցությանը, իսկ էպատաժային օլիգարխ և armwrestling–ի նախկին չեմպիոն Գագիկ Ծառուկյանի գլխավորած դաշինքին` 28 տոկոսը։ Երրորդը «Ելք» դաշինքն է (6 տոկոս)։
Հայկական Թրամփ
Ծառուկյանի «Բարգավաճ Հայաստան» կուսակցությունը 5–րդ գումարման խորհրդարանում ուներ 33 մանդատ։ Նրան, 2006 թ.–ին հրապարակված WikiLeaks–ի տվյալներով, բնութագրում էին որպես մարդ, «ում ֆոնին Դոնալդ Թրամփը կարծես ասկետ լինի»։ Նա մասնակցում է նախընտրական պայքարին երկրի նախագահի հետ` երկու տարի տևած առճակատումից հետո։
ՀՀ վարչապետ Կարեն Կարապետյանը գլխավորել է ՀՀԿ–ի նախընտրական արշավը, սակայն ներառված չէ թեկնածուների ցանկում։ Հանրապետականները հայտարարել են, որ եթե կուսակցությունը հաղթի ընտրություններում, Կարապետյանը կշարունակի զբաղեցնել իր պաշտոնը։ Սարգսյանը ռուսական «Գազպրոմի» նախկին թոփ–մենեջեր Կարապետյանին սեպտեմբերին նշանակեց ՀՀ վարչապետի պաշտոնում` հայտարարելով, որ նա «փոփոխությունների ալիք» կառաջացնի։
Կարապետյանը նոյեմբերին հայտարարեց, որ նախկին խորհրդային հանրապետությունը, որը ՌԴ–ի գլխավորած ԵՏՄ–ի անդամ է, «արմատական փոփոխությունների» կարիք ունի` կոռուպցիայի դեմ պայքարի և արագ զարգացման համար։ Հայաստանի տնտեսությունը 2016 թ.–ին, նախորդ տարվա համեմատ, աճել է ընդամենը 0,2 տոկոսով, ինչն ամենացածր ցուցանիշն է 2009 թ.–ից` ըստ ՀՀ ԱՎԾ–ի։
Ընտրությունների արդյունքների կանխատեսում
Լոնդոնի IHS Markit–ի գլխավոր տնտեսագետ Լիլիթ Գևորգյանը հայտարարել է, որ ընտրություններում կհաղթի «ներկա քաղաքական վերնախավը, որը վերահսկում է տնտեսությունը»։ Նա նշեց, որ սահմանադրական փոփոխությունները ձեռնարկվել են, որպեսզի հանրապետականները կարողանան «պահել իշխանությունն» ու «ապահովության մեջ պահել սեփական խոշոր բիզնես–շահերը»։–0