Ո՞ր ուժերն են պահում Արամ Աթեշյանին Պոլսո Հայոց պատրիարքարանում. արքեպիսկոպոս Բեկչյանը կոչ է արել Աթեշյանին անկեղծանալ
Պոլսո Հայոց պատրիարքի տեղապահի պաշտոնում ընտրված Գարեգին արքեպիսկոպոս Բեկչյանը քննադատել է Պոլսի պատրիարքի փոխանորդի պաշտոնում մնալ շարունակող Արամ Աթեշյանին, ով հրաժարվում է թողնել պաշտոնը` չնայած ընտրություններում կրած պարտությանը. այս մասին գրում է «Ակօսը»:
Հիշեցնենք, որ փետրվարին Էջմիածնում կայացված որոշման համաձայն՝ մարտի 15-ին Ստամբուլում տեղի ունեցավ Պոլսո Հայոց պատրիարքի տեղապահի ընտրություն: Ընտրությունից հետո, որում համոզիչ հաղթանակ էր տարել Արամ Աթեշյանի հակառակորդ Գարեգին արքեպիսկոպոս Բեկչյանը, Ստամբուլի նահանգապետարանն անակնկալ կերպով միջամտել էր ընտրություններին: Ստամբուլի նահանգապետի տեղակալը նախքան պատրիարքարանում ընտրությունների սկսվելը գրություն է ուղարկել, որն իրավաբանորեն անհնար է համարում պատրիարքական ընտրությունների գործընթացի մեկնարկը: Այս գրությունը Պոլսո Հայոց պատրիարքի տեղապահի ընտրություններից անմիջապես հետո պատրիարքարանի հոգևորականներին է ներկայացրել տեղապահի ընտրություններում պարտված փոխանորդ Արամ արքեպիսկոպոս Աթեշյանը և հայտարարել, որ չի հեռանա տեղապահի պաշտոնից:
«Արամ Աթեշյանը տարիներ շարունակ խոսում է պատրիարքարանում ինչ-որ ուժերի հավասարակշռություն պահելու անհրաժեշտության մասին: Ի՞նչ հավասարակշռության մասին է խոսքը, ի՞նչ ուժերի, կարո՞ղ ենք իմանալ: Ո՞վ է ստեղծել այդ հավասարակշռությունն ու ի՞նչ նպատակով: Ցավոք, այդ հարցերի պատասխանները հայտնի են բոլորին, սակայն այնքան տխուր են, որ մենք չենք էլ ուզում լսել դրանք», - ասել է Բեկչյանը` կոչ անելով Աթեշյանին բացատրել իր «հավսարակշռության բանաձևի» և պետության հետ իր ունեցած պայմանավորվածությունների մասին:
Ավելի վաղ Բեկչյանը նամակով դիմել էր Արամ Աթեշյանին` խնդրելով նրանից կատարել Մայր Աթոռ Սուրբ Էջմիածնում Ամենայն Հայոց կաթողիկոս Գարեգին Բ-ի հրավիրած ժողովի ընթացքում կայացված որոշումներն ու հարգել համայնքային ընտրության արդյունքները: Բեկչյանը նաև պահանջել է Աթեշյանից այլևս չօգտագործել «պատրիարքի փոխանորդ» սահմանումն իր անվան կողքին և հայտնել է, որ Թուրքիայից իր բացակայության ընթացքում պատրիարքի տեղապահի լիազորությունները նա վստահել է Եկեղեցական խորհրդի նախագահ Սահակ եպիսկոպոս Մաշալյանին, որն էլ կկատարի դրանք:
Հիշեցնենք, որ Պոլսո պատրիարք Մեսրոպ Մութաֆյանը կոմայի մեջ է գտնվում 2008թ.-ից և փաստացի չի կարող կատարել պատրիարքի իր լիազորությունները։ Նրա փոխարեն այդ լիազորությունները կատարում էր Արամ արքեպիսկոպոս Աթեշյանը, որն ընտրված է ոչ թե համայնքի, այլ պետության կողմից:
Ստամբուլի հայ համայնքի ներկայացուցիչները տևական ժամանակ է՝ պահանջում էին կայացնել նոր ընտրությունների անցկացման որոշում՝ ցանկանալով իրենց առաջնորդի դերում տեսնել ոչ թե պետության կողմից նշանակված, այլ իրենց ձայների արդյունքում ընտրված անձի: