Երևանի փողոցներից այսօր 2 անօթևան է ուղարկվել հոգեբուժարան. քաղաքապետարանի ներկայացուցիչը պնդում է՝ զբաղվում են նաև մյուսների խնդրով
«Հանս Քրիստիան Կոֆոեդ» հայ-դանիական անօթևանների կացարանի ու Երևանի քաղաքապետարանի ջանքերով այսօր հոգեբուժարան է տեղափոխվել 2 անօթևան, որոնք հոգեկան առողջության խնդիրներով ձմռան ցրտին հայտնվել են փողոցում:
Այս մասին Tert.am-ի հետ զրույցում ասաց Երևանի քաղաքապետարանի սոցապ վարչության պետ Ռուզաննա Զաքարյանը:
Հարցին, թե քանի անօթևան է ցրտահարություն ունեցել այս տարի, քաղաքապետարանի ներկայացուցիչը դժվարացավ պատասխանել՝ հավելելով, որ կացարանում այս տարի եղել է 16 անօթևան:
Վարչության պետի խոսքով՝ արդեն 2-րդ տարին է, ինչ քաղաքապետարանը չի ֆինանսավորում անօթևանների ծրագիրը, սակայն հետևում է «Հանս Քրիստիան Կոֆոեդ» հայ-դանիական բարեգործական հիմնադրամի անօթևանների կացարանի աշխատանքներին, որն էլ անօթևանների խնդրով զբաղվող կառույցն է Հայաստանում: Հիմնադրամն աշխատում է պետության հետ տարեկան 56 մլն դրամ համաֆինանսավորմամբ ու կարող է պահել ընդամենը 100 անօթևանի:
Զաքարյանի խոսքով՝ 2011 թվականից մինչ այժմ ավելի քան 700 անօթևան է տեղափոխվել «Հանս Քրիստիան Կոֆոեդ» կացարան: «Բայց այսօր ունենք 101 անօթևան, որովհետև կատարված աշխատանքների արդյունքում ինտեգրվել, ինքնուրույն կյանքի է վերադարձել շուրջ 277-ը: Նրանցից 15-ը ընտանիք է կազմել, հեռացել կացարանից, 23-ը տեղափոխվել է մարզեր, 96 անօթևան տեղափոխվել է ծերանոց: Ավելի քան 13 անօթևան տեղափոխվել է հոգեբուժարան: Դուրս գրվելուց հետո սոցապը նրանց տեղավորում է համապատասխան հաստատություններում»,-ասաց վարչության պետը:
«Հանս Քրիստիան Կոֆոեդ» հայ-դանիական բարեգործական հիմնադրամի անօթևանների կացարանի տնօրեն Շավարշ Խաչատրյանը մինչդեռ Tert.am-ի հետ զրույցում ասել էր, որ «փողոցներում հանդիպող անօթևանները հիմնականում այն մարդիկ են, ովքեր ունեն հոգեկան խնդիրներ: Հոգեբուժարանը 21 օր պահում է, հետո հանում, դուրս է շպրտում»:
Ռուզաննա Զաքարյանն ասում է, որ հոգեկան խնդիրներ ունեցող անօթևաների հարցը պետք է լուծի առողջապահության նախարարությունը՝ սոցապի հետ, քաղաքապետարանն էդտեղ անելիք չունի: «Անգամ մոտենում ենք, փորձում ենք կոնտակտի մեջ մտնել, փորձում ենք պարտադրաբար օգնել այդ անձանց, որովհետև մարդիկ կան նրանց մեջ, որոնք կախվածություն ունեն թմրամիջոցներից և խմիչքից, խուսափում են կացարաններից, որտեղ արգելվում է նման բաներով զբաղվելը: Մուրացկանությամբ զբաղվողների խնդիր էլ կա: Հիվանդներին անմիջապես տեղափոխվում ենք բժշկական հաստատություններ, բայց կան մարդիկ, որ ինքնակամ լքում են կացարանը»,-ասաց քաղաքապետարանի ներկայացուցիչը:
Արդեն տեղեկացրել ենք, որ Հայաստանի կառավարությունը գումար չի հատկացրել 20 մահճակալով անօթևանների բաշխիչ կենտրոն ստեղծելու համար, չնայած որ որոշումը ընդունել է դեռ այս գարնանը։ Արդյունքում՝ անօթևանների մի մասը Հայաստանի ցրտաշունչ ձմեռը փողոցներում ու կանգառներում է անցկացնում՝ ցրտահարման հետևանքով անդառնալի վնաս հասցնելով սեփական առողջությանը ու վերածվելով հաշմանդամի:
«Հանս Քրիստիան Կոֆոեդ» կացարանի տնօրենի համար անհասկանալի է, որ պետությունը, օրինակ Երևանի քաղաքապետարանը, կարող է տարեկան 220 մլն դրամ գումար հատկացնել թափառող շների դեմ պայքարին, իսկ անօթևանների համար ընդամենը 56 մլն դրամ է հատկացնում ու գումար չունի անօթևանների բաշխիչ կենտրոնը գործարկելու համար: «Ես ինքս էլ եմ զարմանում, որ տարեկան այդքան մլն դրամ տալիս են շների դեմ պայքարի կամ կենդանիների պահպանության համար, իսկ մարդկանց համար այդքան քիչ է հատկացնում»,- ասել էր տնօրենը:
Tert.am-ի հարցին, թե գումարների հատկացման առթիվ անարդարություն չի՞ տեսնում, քաղաքապետարանի ներկայացուցիչը պատասխանեց. «Կոռեկտ չէ համեմատության մեջ դնել: Յուրաքանչյուր ծրագիր, յուրաքանչյուր աշխատանք ունի իր ֆինանսական արժեքը, որը ձևավորվում է տվյալ ծրագրի իրականացման համար՝ կախված նախատեսվող աշխատանքների ծավալից»: Զաքարյանը նաև հավելեց, որ անօթևանների բաշխիչ կենտրոնի գործարկման դեպքում «բավական դյուրին կլինի իրենց աշխատանքը»: «Դա հրաշալի միջոց է լինելու և շատ կօգնի ծրագրին»:
Ըստ քաղաքապետարանի ներկայացուցչի՝ 700 անօթևանից 103-ը նախկին բանտարկյալ է, ովքեր բանտերից դուրս գալուց հետո հայտնվել են փողոցում: Ռուզաննա Զաքարյանի խոսքով՝ քաղաքապետարանն իր ենթակայության տակ գտնվող կառույցներում աշխատանքի է ընդունել 16 անօթևանի: