Булуҥҥа Ийэ күнүгэр анаммыт нэдиэлэ ураты сэргэҕинэн үөртэ
Булуҥҥа Ийэ күнүгэр аналлаах нэдиэлэ сэтинньи ыйы түмүктүү ыытылынна. Манна дьон-сэргэ хаһааҥҥытааҕар да өрө көтөҕүллэн кытынна. Ол курдук, «Маяк Арктики» улуус хаһыатын көҕүлээһининэн «Мамочка, любимая моя» оҕолорго уруһуй куонкуруһа буолла. Манна үһүттэн 14-гэр диэри саастаах 94 оҕо кытынна. Түмүккэ куонкурус кыттааччыларыгар дипломнар, сертификаттар уонна сэмэй бэлэхтэр туттарылланнар, оҕолор олус үөрдүлэр, астыннылар.
Маны таһынан, үтүө санааланыы чэрчитинэн тэриллибит «Взаимопомощь» аахсыйаҕа Тикси, Тикси-3 олохтоохторо таҥас-сап хомуйан туттарыыга көхтөөхтүк кытыннылар. Муспут таҥастарын-саптарын элбэх оҕолоох ийэлэргэ туттартаатылар. Маннык аахсыйаны оройуоннааҕы дьахталлар сэбиэттэрэ көҕүлээн ыытта.
Онтон дьиэ кэргэҥҥэ уонна оҕолорго социальнай көмө Киинигэр элбэх оҕолоох ийэлэри чиэстээһин биэчэрэ ураты истиҥ тыыннанна. Кииҥҥэ сылдьар, дьарыктанар оҕолор ийэлэргэ бэртээхэй кэнсиэр көрдөрдүлэр. Онтон «Вкусняша» кулууп минньигэс астаах-үөллээх фуршет тэрийдэ итиэннэ аан бастаан таһаарбыт аска-үөлгэ ырысыаптарын кинигэтин сүрэхтэниитин оҥордо. Истиҥ киэһэҕэ ытыс тыаһыгар доҕуһуоллатан ийэлэргэ оҕолор бэйэлэрэ оҥорбут бэртээхэй эҕэрдэ аккырыыккаларын кытары бэлэхтэр туттарылыннылар.
Култуура-спорт киинигэр дьахталларга улуустааҕы VI спартакиада өрө көтөҕүллүүлээхтик ыытылынна. Манна биэс хамаанда күөн көрүстэ. Бары хамаанданан биир көстүүмнэнэн, ааттанан-суолланан, эмблемаланан, девизтэнэн, кыайардыы-хотордуу ох курдук оҥостубуттара күрэхтэһии тыҥааһыннаах буоларын тута көрдөрдө. Спортсменкалар чэпчэки атлетикаҕа (эстафетаҕа,уһуну ыстаныыга), фитнес-аэробикаҕа, волейболга, остуол тенниһигэр, дуобакка, шахмакка, наартаны ойууга, хаамыскаҕа, хабылыкка эрбии тииһин курдук эгил-тэгил эристилэр. Дьон-сэргэ бу тэрээһинтэн улаханнык астынна. Манна даҕатан эттэххэ, дьахтар аймахха чөл, чэгиэн доруобуйалаах буолууну киэҥник тарҕатар, физкультуранан дьарыктанарга угуйар, доруобуйаны чэбдигирдэр үлэни сайыннарар сыаллаах-соруктаах бу спартакиада тэриллэр. Маныаха ону таба өйдөөн, кыттааччы ахсаана сыллата элбээн иһэрэ үөрдэр. Спартакиада түмүгүнэн бэлиэтээтэххэ, кыттааччылар уонна көрөөччүлэр фитнес аэробиканы ордук кэрэхсиир эбиттэр. Тоҕо диэтэххэ, бу көрүҥҥэ хамаанда тэҥҥэ хамсаныыта, имигэс буолуута, тэтимэ болҕомтону ордук тардар буолуон сөп.
Ити курдук, спартакиада уоттаахтык-күөстээхтик барда, элбэх көрөөччүнү түмтэ. Үөрүүлээх тэрээһин хаартыскаҕа түһүүнэн түмүктэннэ. 1 из 4