Лэгэнтэй алгыстаах айана
Үөһээ Бүлүүгэ улуус, нэһилиэк Бочуоттаах олохтооҕо, тыыл, педагогическай үлэ бэтэрээнэ, РФ суруналыыстарын сойууһун чилиэнэ Иннокентий Васильевич Степанов – Лэгэнтэй «Алгыстаах айан» кинигэтин сүрэхтэниитэ буолла. Саҥа кинигэҕэ ааптар алгыстаах хоһоонноро, СӨ, Үөһээ Бүлүү улууһун социальнай-экономическай сайдыытыгар сүҥкэн кылаатын киллэрбит дьоннор тустарынан ыстатыйалар уонна бэйэтин туһунан бэлиэтээһиннэр сүүмэрдэнэн киирбиттэр. Кинигэ «Издательство Сфера» ХЭТ-ҕэ «Творческие родники Якутии» сиэрийэнэн 200 ахсаанынан бэчээттэммит. Барыта алта түһүмэхтээх. Ааҕааччы аан бастакы түһүмэххэ алгыс санаа аргыстаах хоһооннору долгуйа, астына ааҕар. Иккискэ литератураҕа анаммыт ыстатыйалар, үһүскэ «Бэлиитикэ – олох иһин охсуһуу», салгыы айылҕа харыстабылыгар анаммыт үлэлэр, онтон «Өтөх төҥүргэстээх, сурт кэриэстээх» түһүмэхтэри биир тыынынан ааҕар. Алтыс түһүмэххэ Иннокентий Васильевичка үөрэнээччилэрэ, үөлээннээхтэрэ суруйбут суруйуулара киллэриллибиттэрэ кэрэхсэбиллээх.
Бу бэртээхэй кинигэни тутан олорон, ытык киһибит Иннокентий Васильевич үлэлээбит үлэтин, олоххо көрүүлэрин, анаарыыларын билсэҕин, кини олох устун айанын сонургуу билсэҕин. Маны сэргэ кэлэр көлүөнэ ыччакка олус туһалаах алгыс тыллары суруйбута сэргэҕэлэтэр.
Кинигэ сүрэхтэниитин РФ суруналыыстарын сойууһун чилиэнэ Иван Чычахов иилээн-саҕалаан ыытта. Кини Иннокентий Васильевич дириҥ философиялаах хоһоонноругар билиҥҥи кэм сыаннастарын, олоҕу ис сүрэхтэн сыаналааһынын көстөрүн бэлиэтээтэ. Кинигэни ааҕа олорон киһи өйдүүрэ-саныыра элбэҕин эттэ.
Бу күн элбэх ырыа ылланна. «Санаа ситимэ» литературнай куруһуок уонна Лэгэнтэй сиэннэрин толорууларыгар ааптар хоһоонноро ааҕылыннылар. Ону сэргэ тапталлаах кэргэнэ, оҕолоро бу үөрүүлээх, долгутуулаах дьоро киэһэҕэ кыттан, тэрээһини ситэрэн-хоторон биэрдилэр. Учуутал үөрэппит оҕолоро долгуйан туран эҕэрдэ бастыҥын тиэртилэр. Иннокентий Васильевич айар үлэтин ытыктааччылар, бииргэ алтыһар дьоно Ульяна Тимофеева, Никита Архипов, Георгий Степанов, Хара Лааҥкы, «Дьүөгэ» бэтэрээн дьахталлар түмсүүлэрэ, улуус баһылыгын солбуйааччы Люция Тойтонова кинигэ сүрэхтэммитинэн истиҥник эҕэрдэлээтилэр, үөрүүнү үксэтистилэр. Түгэнинэн туһанан общественнай корреспондеммытын, аҕа табаарыспытын Иннокентий Васильевич Степановы кинигэтэ сүрэхтэммитинэн истиҥник эҕэрдэлиибит, бары үтүөнү баҕарабыт! Ытык киһибит айа-тута тур диэн үтүө санаабытын тиэрдэбит.