Ийэ күнүн көрсө далааһыннаах тэрээһин ыытылынна
Ийэ күнүн көрсө Хаҥаласка, Төхтүр нэһилиэгэр, далааһыннаах тэрээһин ураты истиҥник, сэргэхтик ыытылынна. «Ийэ – аан дойду аанньала» декаданы нэhилиэк ийэлэрин общественнай олоххо көҕүлүүр сыаллаах «Эркээни» КК, орто оскуола, олохтоох бибилэтиэкэ ситимэ тэрийдилэр. Оскуола үөрэнээччилэригэр «Ийэлэр хорсун быhыылара» диэн тиэмэҕэ уруһуй быыстапката, өйтөн суруйуу күрэһэ, кылаас чаастара олус көхтөөхтүк ыытылыннылар. Хас биирдии кылааска төрөппүттэр араас хайысхалаах маастар кылаастары биэрдилэр. Сахалыы астары астааһыны, оҕуруонан киэргэллэри тиhиини, өбүгэ үгэстэригэр үөрэтиини оҕолор олус сэҥээрдилэр, биһирээтилэр.
Декада устатыгар олохтоох бибилэтиэкэҕэ «Дьүөгэ» түмсүү көхтөөх кыттааччыта Елена Соломонова, нэһилиэк дьахталларын сэбиэтин салайааччы Матрена Ефремова, уран тарбахтаах Венера Пестерева үлэлэрин, хаартыскаҕа түһэриилэрин быыстапкалара туруоруллан болҕомтону тартылар.
«Аhаҕас аан күнэ» диэн биир күн эдэр ийэлэргэ ананна. Манна СӨ дьиэ кэргэҥҥэ уонна ыччакка психологическай өйөбүлү оҥорор киин Хаҥаластааҕы салаатын үлэһиттэрэ оҕону иитии боппуруостарыгар аһаҕас кэпсэтиини тэрийдилэр. Онтон социальнай көмөлөр тустарынан нэһилиэнньэ социальнай көмүскэллээх буолуутун киинин исписэлиистэрэ билиһиннэрдилэр, сүбэ-ама биэрдилэр.
Декаданы түмүктүүр поэзия иһирэх киэһэтэ үгүс көрөөччүнү долгутта. Төхтүр нэһилиэгин «Айар Кут» түмсүүтүн кыттыылаахтара, олохтоох ааптардар ийэ туһунан айымньыларын киэҥ араҥаҕа ааҕан иһитиннэрдилэр. Кинилэри сэргэ оскуола оҕолоро, нэһилиэк олоҕор көхтөөхтүк кыттар дьон эмиэ күн күбэй ийэҕэ анаммыт хомоҕой хоһооннору дорҕоонноохтук ааҕан истиҥ киэһэни киэргэттилэр.
Биир сонун тэрээһининэн «TV-MIX — мамы рулят» диэн дьикти ааттаах күөн күрэс буолла. Шоу куонкуруска түөрт көлүөнэ ийэлэр бөлөҕүнэн кытыннылар. Тэлэбиисэринэн биэриилэргэ олоҕуран оҥоһуллубут күрэс олус тыҥааһыннаах сэттэ түһүмэҕин эрэллээхтик туораан «Техасские мамочки» эдэр ийэлэр хамаандалара биэтэккэ кыайыылаах таҕыста. «Онлайн мамочки» орто саастаах ийэлэр иккис миэстэҕэ, үһүс бочуоттаахха аҕа саастаах ийэлэргэ — «Дьүөгэ» нэһилиэк эбээлэрин түмсүүтэ таҕыстылар. «Pretty women» 40-тан 50-нарыгар диэри саастаах ийэлэр хамаандалара «көхтөөх кыттааччылар» диэн анал ааты ыллылар.
Эркээни Хочотун сэргэстэһэ сытар Төхтүр уонна Өктөм нэһилиэктэрин култуураларын кииннэрэ алтыһан тэрээһиннэри бииргэ ыытар үгэстээхтэр. Күн күбэй ийэлэргэ анаан олохтоох талба талааннар кыттыылаах, сүүйүүлээх лотереялаах, мааны астаах сандалылаах «Таптыаҕыҥ ийэни» сынньалаҥ киэһэни тэрийдилэр. Бу дьоро киэһэҕэ кулууп дьиэтигэр толору тоҕуоруспут ийэ дьон санаалыын чэпчээн, дьүөгэлэрин кытта көрсөн истиҥник сэлэһэн, күннээҕи түбүктэриттэн сынньанан, оонньоон-көрүлээн, астына үҥкүүлээн үөрдүлэр-көттүлэр.