500 адамгъа орну болгъан кинозал
Быйыл къышха дери Зеленчук районну административ аралыгъында, Культураны къаласында, заманны излемине келишген цифровой кинопроекцион оборудованиеси болгъан кинозал ишлеб башларыкъды.
- Бу ишге башламчылыкъ КъЧР-ни Культура министерствосу этгенди. Ата джуртлу кинематографиягъа социал эмда экономика джаны бла джакълыкъ этген федерал фонд да бир джанындан дагъан болгъанды, - деб билдиргенди Зеленчук районну администрациясыны бёлюм тамадысы Елена Сердюкова. – Ол фондну юсю бла бизге 4 миллион 950 минг сом тюшгенди.
Ол айтханнга кёре уллу джюрек учунмакълыкъ бла этиледи иш, айтылгъан болджалгъа кинозал хазыр боллукъду. Бюгюнлюкде Barco DP 2K -10S цифровой кинопроектор бла алты колонка салына турадыла, залгъа
шиндиклени сайлау барады, кёб турмай киноэкран бла –Dolby CP 750 таууш берген кинопроцессор сатылыб алынныкъдыла.
Бу кинозалгъа 500 адам сыйынныкъды. Декабрны 1-де киносеансланы кёргюзюу башланныкъды. Бизни къралны фильмлерин эмда миллет киноланы кёргюзюуге айырылыб эс бёллюннюкдю – патриот сезимлени сингдирир эмда миллет культураны айнытыр иннет бла этилликди ол зат.
Ата джуртлу кинематографиягъа социал эмда экономика джаны бла джакълыкъ этген федерал фонд конкурсну тамалында 655 заявкадан 143-юн сайлагъанды – насыбха, Зеленчук стансе да аланы бири болгъанды.