Ածանցյալ ֆինանսական գործիքների օրենսդրությունը կբարեփոխվի
ՀՀ կառավարությունն այսօրվա նիստում հավանություն է տվել «Արժեթղթերի շուկայի մասին» օրենքում փոփոխություններ եւ լրացումներ կատարելու մասին» օրենքի նախագծին, ինչպես նաեւ դրա ընդունմամբ պայմանավորված այլ օրենքներում փոփոխություններ եւ լրացումներ կատարելու մասին ՀՀ օրենքների նախագծերին:
Գործադիրի համաձայն` նախագծերի ընդունումը պայմանավորված է Հայաստանում ֆինանսական, մասնավորապես`ածանցյալ գործիքների (ֆյուչերս, ֆորվարդ, օպցիոն, սվոփ, ռեպո) շուկայի զարգացման եւ խթանման անհրաժեշտությամբ։
ՀՀ Կենտրոնական բանկի նախագահ Արթուր Ջավադյանի խոսքով` օրենսդրական փաթեթի ընդունումը քաղաքացիներին հնարավորություն կտա ածանցյալ գործիքների օգնությամբ դուրս գալ միջազգային շուկա:
«Նման ֆինանսական գործարքների կիրառումը հնարավորություն կտա ձեռնարկատերերին զսպել իրենց գործունեության հետ կապված տարբեր ռիսկեր (այդ թվում` արտարժույթի, հումքի գնի, վարկի տոկոսադրույքի եւ այլ շուկայական տատանման հետ) եւ կունենա իր դրական ազդեցությունը Հայաստանի տնտեսության վրա»,- նշված է հիմնավորման մեջ:
Նախագծերի ընդունումը բխում է Արժույթի միջազգային հիմնադրամի հետ 2016թ. ստորագրված «Մտադրությունների մասին» նամակից, համաձայն որի` Հայաստանը պարտականություն է ստանձնել բարեփոխել ածանցյալ ֆինանսական գործիքներով կնքված գործարքների նկատմամբ կիրառվող օրենսդրությունը:
Բարեփոխումներն իրականացվում են Վերակառուցման եւ զարգացման եվրոպական բանկի հետ համագործակցությամբ՝ վերջինիս կողմից ներկայացված լավագույն միջազգային փորձի եւ ISDA (Սվոփերի եւ ածանցյալների միջազգային ասոցիացիա) մոդելի հիման վրա: