Մեզ համար Վանաձորը փոքր Հայրենիք է, ընդդիմության համար, ցավոք, ինքնահաստատման վայր. Մամիկոն Ասլանյան
Tert.am-ի հետ զրույցում ՀՀ Լոռու մարզի «Վանաձոր» նոտարական գրասենյակի նոտար, Հայաստանի Հանրապետական կուսակցության թեկնածու Մամիկոն Ասլանյանն անդրադառնում է արդեն ավարտին մոտեցող նախընտրական քարոզչությանը, իր նախընտրական ծրագրերին: Ինչ վերաբերում է հիմնական մրցակից քաղաքական ուժերին, ապա ՀՀԿ-ական թեկնածուն ասաց, որ իր համար խորթ է միմյանց վիրավորելը, լավ է, որ հետո միասին գինի են խմել. «Մենք գոնե հացի գինը և հայկական ավանդույթների գինը լավ ենք պատկերացնում: Քարոզարշավի ամբողջ ընթացքում ասել եմ, որ հոկտեմբերի 3 է գալու, իրար աչքերի մեջ պետք է կարողանալ նայել ընտրություններից հետո: Փաստորեն, ոմանց համար առերեսման պահը ավելի շուտ եկավ»:
-Պարո՛ն Ասլանյան, եթե ամփոփելու լինենք վանաձորցիների հետ Ձեր անցկացրած քարոզարշավը, որն արդեն ավարտին է մոտենում, ինչպե՞ս այն կգնահատեք:
-Բավական ակտիվ հանդիպումներ են եղել և՛ անհատ քաղաքացիների, և՛ տարբեր կոլեկտիվների հետ: Ոգևորություն կա և՛ ինձ մոտ, և՛ մարդկանց: Եվ ժողովրդի հետ շփումներից շատ դրական լիցքեր եմ ստանում, որովհետև ժողովուրդը կարիք ունի և՛ շփման, և՛ ադեկվատ պատասխանների: Կարծում եմ, որ նրանց մոտ բավականին նորմալ տրամադրություններ են, և չնայած մեր մրցակիցների կողմից ստեղծված արհեստական լարումներին, Վանաձորի հասարակությունն այնպիսին չէ, որ տուրք տա նման առճակատման պրոցեսներին։ Վանաձորցին այսօր ուզում է ունենալ նորմալ քաղաքապետ, որը քաղաքի խնդիրներին լուծում կտա` անկախ կուսակցական պատկանելությունից: Եվ չեմ կարծում, թե Վանաձորի քաղաքապետը հոկտեմբերի 3-ից հետո մարդկանց պետք է նայի կուսակցական պրիզմայից: Վանաձորի քաղաքապետը պետք է լինի յուրաքանչյուրի քաղաքապետը, և ժողովուրդը հենց այդպես էլ ընկալում է քաղաքապետի թեկնածուին ու էդպիսի եզրահանգման է եկել:
-Այսինքն` որ Դուք ՀՀԿ ներկայացուցիչ…
-Նախ՝ ես առաջին հերթին մարդ եմ, որն էս ժողովրդի հետ է ապրել, աշխատել ու ամենօրյա շփման մեջ է, և ժողովուրդն ավելի շատ իմ անձը տեսնելով ու որոշակիորեն ճանաչելով, նաև ծանոթանալով ծրագրերին՝ համոզված է, որ ես նեղ կուսակցական որևէ շահ չեմ սպասարկելու, նման գործելաոճն ինձ համար խորթ է, հետևաբար, ինձ հետ ժողովուրդը որոշակի հույսեր է կապում: Եվ կարծում եմ, որ կկարողանամ նրանց հույսերն արդարացնել, նաև քանի որ այլ տարբերակ չկա։ Իրականում Վանաձորում խնդիրները շատ են, կուտակված են: Եվ Վանաձորի քաղաքապետը պետք է ստանա ժողովրդի ամուր քվեն՝ Վանաձորի խնդիրները կենտրոնական իշխանությունների մոտ վեր բարձրացնելու, դրանք լուծելու համար։ Պետք է քաղաքում նորմալ ծրագրեր իրականացնի, որպեսզի էս քաղաքում մթնոլորտ փոխվի, աշխատանքներ կատարվեն: Սա շատ կարևոր է, որովհետև Վանաձորում, մի տեսակ, այդ հուսալքության պահը կա, որ «ոչինչ չի փոխվում»: Ես խոստացել եմ ու կրկին խոստանում եմ, որ փոխվելու է. այդ շոշափելի տեղաշարժը մոտ ապագայում երևալու է:
-Այսինքն՝ ընտրվելու դեպքում կարո՞ղ եք ասել, որ Ձեր նախորդից այդքան էլ լավ ժառանգություն չեք ստացել:
-Ես ժառանգության մասին չեմ էլ մտածում, ես մտածում եմ արձանագրել ողջ պրիզման՝ բացթողումների, թերացումների, չկատարած, կիսատ աշխատանքների, որպեսզի կարողանանք նորմալ աշխատել:
-Ուղղակի, եթե ընտրվեք շատ կիսատ-պռատ գործեր եք ստանձնելու:
-Բնականաբար, շատ չկատարված աշխատանքներ կան՝ աղբահանության խնդիր կա քաղաքում, ասֆալտապատման խնդիր կա, որը 30 տարվա ժառանգություն է, որովհետև այդքան ժամանակ ճանապարհների շինարարության հիմնանորոգման աշխատանքներ չեն եղել: Բնականաբար, անելիք շատ կա: Բայց պետք է կարողանանք ուժերի գերլարումով այս քաղաքն այս պայմաններից դուրս բերել: Կարծում եմ` կկարողանամ լուծել խնդիրները, նաև տեսնում եմ այդ խնդիրները լուծելու ուղիները: Նաև աշխատելով այնպիսի թիմի հետ, որը կգործի ի շահ քաղաքի:
-Ներկայացրեք Ձեր նախընտրական ծրագրի ամենակարևոր 3 հիմնադրույթները:
-Աղբահանություն. այս հարցը վերջնական կլուծվի, դա արդեն կարելի է ասել, որ լուծված ծրագիր է, մնում է ազդարարել սկիզբը, Վանաձորի ճոպանուղին կկառուցվի, որը նաև կնախանշի քաղաքի վերակառուցման զարգացման առաջնահերթություններից գոնե մեկը`սպորտային և ձմեռային տուրիզմը, նաև հուսով եմ` Ասիական զարգացման բանկի միջոցով Վանաձորի 200 կիլոմետրանոց ներհամայնքային ավտոճանապարհների շինարարության աշխատանքները կիրականացվեն:Կարծում եմ` սրանք բոլորը գլոբալ խնդիրներ են, իսկ մնացած հարցերը, որոնք հնարավոր է կարգավորել բյուջեով, ուղղորդումն ու ճիշտ պլանավորումն է: Հետևաբար, մենք սկզբնական շրջանում կսկսենք աշխատել առաջնահերթությունների, խնդիրներն ըստ հրատապության աստիճանի դասակարգելու և աշխատանքները պլանավորելու ուղղությամբ:
-Քաղաքից արտագաղթ տեսնու՞մ եք:
-Ոչ թե տեսնում եմ, այլ Վանաձորը, մինչև 90-ականները լինելով արդյունաբերական հզոր քաղաք, աշխատող զանգվածի համար ապահովել է հիմնական աշխատատեղեր, հիմա այդ գործարանները չկան, Վանաձորում աշխատատեղեր չկան, զբաղմունքի տեսակ էլ չկա, որ մարդիկ կարողանան զբաղված լինել, ներգրավված լինել աշխատանքային պրոցեսի մեջ, քանի որ աշխատող ձեռնարկություններ չկան: Եվ մենք նաև այդ աշխատեղերի ստեղծման ուղղությամբ ենք մտածում։ Երբ կնախանշվեն քաղաքի զարգացման առաջնահերթությունները, այդ ժամանակ մենք կարձանագրենք մեր մոտեցումները, որովհետև վանաձորցին իր քաղաքին միշտ կապված է եղել և կարծում եմ, որ եթե նույն աշխատավարձով կարողանան աշխատել Հայաստանում, կվերադառնան:
-Քաղաքի բյուջեն Ձեզ բավարարու՞մ է, որքա՞ն է։
-Ինձ չպետք է բավարարի, քաղաքի բյուջեն քաղաքին պետք է բավարարի: Բնական է, Վանաձորը խորհրդային ժամանակաշրջանում 200 հազար բնակչի համար է նախատեսված եղել և տնտեսությունն էլ է այդքան մեծ բնակչությամբ հաշվարկված: Իսկ հիմա Վանաձորում բնականաբար, բյուջեն այնքան մեծ չէ, որ կարողանա ամբողջությամբ բավարարել մեծ հարցերի լուծելումը: Բայց այն, ինչ այսօր կա, գոնե դրա հիման վրա հնարավոր է մեր քաղաքում կանաչապատման աշխատանքներ իրականացնել, խաղահրապարակներ ստեղծել: Եվ հատված-հատված որոշակի խնդիրներ կլուծենք` ճիշտ պլանավորելով աշխատանքը: Կարծում եմ` բյուջեն բավարար է, ուղղակի բյուջեի ճիշտ տնօրինումն է առաջնահերթ խնդիր: Եվ մենք մեր աշխատանքների մասին կիրազեկենք հասարակությանը և՛ առցանց, և՛ հաշվետվությունների եղանակով, որպեսզի հանրությունն ականջալուր լինի բյուջեի տեղաշարժին: Առհասարակ, քաղաքում տեղի ունեցող երևույթներին:
- Բավականին արմատական ընդդիմության ներկայացուցիչներ են Ձեր քաղաքական թիմի մրցակիցները` «Լուսավոր Հայաստան», «Քաղաքացիական պայմանագիր»: Չափե՞լ եք Ձեր հնարավորությունները, նրանցը:
-Չեմ ուզում ո՛չ համեմատել, ո՛չ համեմատվել, մենք անում ենք մեր գործը, մենք գիտենք, որ մեր ուղղվածությունը հանուն քաղաքի է: Մենք նկրտումներ՝ այլ քաղաքական հարթակներում մեզ ցուցադրելու կամ քաղաքական դիվիդենտներ շահելու և դրանք օգտագործելու նպատակներ չունենք: Հետևաբար, մեր մրցակցությունը հանուն Վանաձորի է և ոչ թե հանուն մեծ քաղաքականության: Իսկ այն քաղաքական ուժերը, որոնք ներկայանում են արմատական կամ թունդ ընդդիմադիրի կեցվածքով, իրենք իրենց մեջ խնդիրներ ունեն, ինչպես ցույց են տալիս վերջին զարգացումները: Եվ, ըստ իս, մարդիկ Վանաձորն ուղղակի օգտագործում են միմյանց նկատմամբ առավել ընդդիմադիր երևալու հակումները ցույց տալու համար: Մեկը սեփական կուսակցությունն է ուզում կայացնի Վանաձորի հաշվին, մյուսը՝ իր միասնական ընդդիմության գաղափարը: Իսկ մեզ համար Վանաձորը պարզապես փոքր Հայրենիք է: Կարծում եմ` վանաձորյան հարթակն այն հարթակը չէ մենամարտեր կազմակերպելու համար, և Վանաձորն այսօր ավելի շատ հուսալիության, վստահելիության մթնոլորտի, քաղաքը սիրող մարդկանց կարիք ունի, ոչ թե իրենց քաղաքական նպատակների համար վանաձորցուն բաժան-բաժան անելու պրոցեսի:
- Ընտրվելու դեպքում ո՞րը կլինի հոկտեմբերի 3-ի Ձեր առաջին քայլը:
-Իմ առաջին քայլը կլինի քարոզարշավի ընթացքում և ընտրական պրոցեսից առաջացած բոլոր սուր անկյունները հարթելը և դրա հետ միասին կլոր սեղանի շուրջ նստելը: Նաև ես հակված եմ, որ քաղաքական ուժերը, որոնք առողջ ծրագրեր կունենան, հետագայում դրանք օգտագործենք: