ՌԴ-ն մոռանում է, որ նավթային պաշարներ ունեցող Ադրբեջանը երբևէ կախված չի լինի իրենից. կարծիքներ արցախյան խնդրի շուրջ
ՀՀ ԳԱԱ Պատմության ինստիտուտի տնօրեն Աշոտ Մելքոնյանն այսօր լրագրողների հետ հանդիպմանն անդրադառնալով Լեռնային Ղարաբաղի շուրջ ապրիլի սկզբից ստեղծված իրավիճակին՝ նշեց, որ սա մեր սովորական պատմությունն է, ավելին՝ հայոց պատմության վերջին հազարամյակի ընթացքում հայ ժողովուրդը երբեք այսքան բարենպաստ վիճակում չի եղել. ունի երկու պետություն և ուժեղ հայոց բանակ։
«Մեր բանակը մեր հաջողության գրավականն է։ Մեր պետականության գլխավոր դրսևորումը հանդիսացող բանակը բարձր մակարդակի է, ու հաղթական զինվորը իր բարձունքում է։ Որքան էլ մարտահրավերները լինեն վտանգավոր, ի վիճակի ենք մարտահրավերները կանխել»,-ասաց նա։
Անդրադառնալով ստեղծված իրավիճակում ռազմավարական դաշնակից Ռուսաստանի վերաբերմունքին, Աշոտ Մելքոնյանը նշեց, որ այն մարտավարական հարցերում դաշնակից է ոչ թե Հայաստանի համար, ռազմավարական գործընկեր Ադրբեջանի։
«Եթե ռազմավարական դաշնակիցը կարծում է, որ ինչպես 1920-ականներին մեր տարածքների հաշվին փորձեց քեմալական Թուրքիայի հետ մերձանալ, որը ի դեպ մոռացավ այդ մասին ու նետվեց Արևմուտքի գիրկն ու դարձավ ՆԱՏՕ-ի անդամ, այսօր կարող է մերձենալ Ադրբեջանի հետ։ ՌԴ-ն փորձում է մոտ պահել Ադրբեջանին իրեն ու հեռացնել Թուրքիայից ու ՆԱՏՕ-ից։ Սակայն մոռանում է, որ ունենալով նավթային միջոցներ՝ Ադրբեջանը երբևէ կախված չի կարող լինել ՌԴ-ից։ Այս պատճառով Ռուսաստանը միակ հարցը, որ կարող է օգտագործել, Ղարաբաղի հարցն է»,-ասաց նա։
Լիբանանի «Ազդակ» թերթի գլխավոր խմբագիր Շահան Գանտահարյանն էլ նշեց, որ ռազմավարական դաշնակից Ռուսաստանի ցուցաբերած չեզոքությունը և քաղաքական հայտարարությունները ոչնչով չէին տարբերվում արևմտյան երկրների ու կառույցների հայտարարություններից։
«Այս չեզոքությունը միևնույն ժամանակ նպաստում է բանակցային գործընթացին։ Ռուսաստանն ի վերջո բանակցային գործընթացում միջնորդական առաքելություն ունի, և չէր կարող որևէ կողմին առավել աջակցել։ Ինչ վերաբերում է Միջինարևելյան երկրների հայեցակետերին, պետք է նշել, որ Լիբանանը միակն էր, որ վերապահ մոտեցում ունեցավ հարցին, սա հաջողություն էր հայ համայնքի համար»,-ասաց նա։
Անդրադառնալով ՀՀ արտաքին դիվանագիտության անելիքներին՝ Շահան Գանտահարյանը նշեց, որ այն Հայ դատի հանձնախմբի հետ պետք է փորձել աշխարհին ցույց տալ Ադրբեջանի հանցագործ դեմքը կամ ահաբեկչական պետական միավոր լինելը։
«Պետք է աշխարհը հասկանա, որ ի վերջո կարելի չէ ապրել մի տարածքում, որտեղ պետությունը ահաբեկչական դիմագիծ ունի, ինչը ապացուցեց քառօրյա պատերազմում իր դաժան վերաբերմունքով թալիշեցիների և հայ զինվորների նկատմամբ»,-ասաց նա։
Աշոտ Մելքոնյանը ևս ընդգծեց, որ Հայաստանը ամբողջ աշխարհին պետք է բացատրի, որ եթե մի փոքր տարածք անգամ հայկական կողմը զիջի, ապա հաջորդ քայլը կլինի ցեղասպանությունը արցախյան բնակչության նկատմամբ։
«Արցախի ժողովրդին ցեղասպանությունից փրկելու միակ ճանապարհը ԼՂ անկախությունը ճանաչելն է, այս մոտեցումը պետք է ամրապնդենք ամբողջ աշխարհի առաջ»,-ասաց նա։