Օրերս բժշկական կենտրոնում մահացել է Արցախում վիրավորված կամավոր Կարո Համբարձումյանը. նախարար
Օրերս «Աստղիկ» բժշկական կենտրոնում մահացել է Արցախում վիրավորված անձնացից մեկը: Այս մասին գործադիր մարմնի նիստից հետո լրագրողների հետ զրույցում ասաց ՀՀ առողջապահության նախարար Արմեն Մուրադյանը՝ հավելելով, որ բազմաթիվ բուժական միջոցառումներ իրականացնելուց հետո, ցավոք, չի հաջողվել նրան փրկել:
«Որովհետև գնդակը խոցել էր փաստացի գլխուղեղը, և զինծառայողը մահացել էր ուղեղի զարգացող այտուցից »,-ասաց Արմեն Մուրադյանը:
Նա նշեց, որ զինծառայողը բազմաթիվ այլ վնասվածքներ է ունեցել, և երկար պայքարից հետո կենտրոնում չի հաջողվել փրկել նրա կյանքը:
armtimes.com կայքը «Աստղիկ» բժշկական կենտրոնից տեղեկացել է, որ մահացածը Սիսիանի ջոկատի կամավորներից Կարո Ծերունի Համբարձումյանն էր, ով եղել էր Մարտակերտի ճանապարհին անօդաչու թռչող սարքով պայթեցված ավտոբուսում:
Արմեն Մուրադյանի խոսքով՝ Այրվածքաբանության կենտրոնում այս պահին երկու կամավոր է գտնվում, որոնց այրվածքային մակերեսը բավական մեծ է եղել, սակայն հաջողվել է փրկել նրանց կյանքը:
Այսօր նախատեսվում է նրանց իրականացնել է վերականգնողական վիրահատություն:
«Կարծում եմ՝ հետագայում ևս նրանց վերականգնողական բուժում է սպասվում: Բայց նրանց կյանքին արդեն որևէ բան չի սպառնում»,-ասաց նախարարը: