Հայաստանը ներդրումների համար լավագույն հարթակներից մեկն է. Արսեն Ղազարյան
«INVEST ARMENIA 2016» ծրագրի համակարգող Վրույր Փենեսյանն այսօր մամուլի ասուլիսին հայտնեց, որ արդեն երկրորդ տարին է անցկացվում «INVEST ARMENIA 2016» միջազգային համաժողով, և այս տարի այն տեղի կունենա ամսի 22-ին: Նա նշեց, որ անցած տարի իրականացված համաժողովի արդյունքներից էր նաև այն, որ տարբեր երկրների հետ կապեր են ստեղծվել. մասնավորապես կապեր են հաստատվել Հայաստանի և Ֆրանսիայի առևտրաարդյունաբերական պալատների հետ: Ըստ նրա, եթե առարկայական առաջարկներ ներկայացվեն, դա կբերի արդյունքի:
«Այնպիսի ընկերություններ ենք հրավիրել, որոնք փորձ ունեն և իրենց փորձը կներկայացնեն, որպեսզի ավելի պատկերավոր լինի մյուս գործընկերների համար՝ միջազգային խոշոր առևտրի ցանցերի հետ աշխատելու խնդիրը: Այդ փորձը, կարծում եմ, որ կլինի արդյունավետ և մարդիկ եզրակացություն կանեն»,-ասաց նա և նշեց, որ նախատեսվում է, որ ֆորումին կմասնակցի 250-ից ավելի գործարար:
Ի դեպ, Վրույր Փենեսյանը հայտնեց, որ սկզբում համաժողովի նկատմամբ մեծ հետաքրքրություն էր ներկայացրել Ղազախստանը և ցանկություն էր հայտնել մեծ պատվիրակությամբ ներկայանալ, սակայն ապրիլյան դեպքերից հետո (նկատի ունի Ադրբեջանի կողմից ապրիլի մեկից նախահարձակ գործողությունները-խմբ) նրանք զանգահարել և հետաձգել են իրենց մասնակցությունը և նշել, որ մյուս անգամ կմասնակցեն համաժողովին:
Հայաստանի արդյունաբերողների և գործարարների միության նախագահ Արսեն Ղազարյանը նշեց, որ տնտեսական զարգացումներ ապահովելու համար լուրջ օտարերկրյա ներդրումներ են հարկավոր, որոնք իրենց հետ կբերեն մենեջմենթի մշակույթ, վերազինում:
«Օտարերկրյա ներդրումների մասին նոր օրենքի նախագիծ է շրջանառության մեջ դրվել, որպեսզի մի քանի աստիճանով ներդրումային դաշտի գրավչությունը բարձրացվի»,-ասաց նա և նշեց, որ ֆորումի նպատակն է վերլուծել այսօրվա Հայաստանի տնտեսության վիճակը, կանխատեսումներ ներկայացնել և տեսնել, թե տնտեսության որ ճյուղերում պոտենցիալ ունենք և ներդրումները որ ոլորտներ ուղղորդվեն:
Նա նշեց, որ չնայած ԵՏՄ-ի ապագայի մասին որոշ չափով հնչում են բացասական գնահատականներ, սակայն գտնում է, որ ԵՏՄ միասնական շուկան ունենալու է մեծ պոտենցիալ:
«Այստեղ մենք շատ ենք կարևորում Հայաստանի կամուրջ լինելու հանգամանքը՝ Իրան-ԵՏՄ տնտեսական զարգացումներ գործում»,-ասաց նա և նշեց, որ օրակարգում նախատեսված է պոտենցիալ ներդրողներին տալ կողմնորոշիչներ՝ մոտակա տարիների գործընթացների վերաբերյալ:
«Հայաստանը ներդրումների համար լավագույն հարթակներից մեկն է: Մենք միշտ կարիք ունենք ներդրումների, դրանք տնտեսական զարգացման առաջին խթանն են»,-ասաց նա և նշեց, որ այստեղի ազատական շուկան, օրենսդրությունը իր պոտենցիալն ունի:
Ինչ վերաբերում է Իրանի հետ համագործակցությանը, ապա նա ասաց, որ Հայաստանն Իրանի համար միակ պետությունն է, որ խիստ պատժամիջոցների պարագայում՝ զարտուղի ճանապարհ գտնելով համագործակցում էր Իրանի հետ:
«Սանկցիաների բացումը ողջունեց Հայաստանը, որովհետև կարծեք մեր սեփական թոքերի բացվածություն է»,-ասաց նա: