ՌԴ արդարադատության նախարարությունը Սավչենկոյին հանձնելու հայտ է ստացել Ուկրաինայից

ՌԴ արդարադատության նախարարությունը ստացել է ուկրաինական կողմի դիմումը փաստաթղթերի ներկայացման մասին, որոնք անհրաժեշտ են ՌԴ-ում դատապարտված ուկրաինուհի օդաչու Նադեժդա Սավչենկոյին Ուկրաինային փոխանցելու համար, որտեղ էլ նա կկրի իր պատիժը: Այս մասին հաղորդում է Meduza  գործակալությունը` վկայակոչելով գերատեսչության մամուլի ծառայությունը:

 

Նախարարությունում պարզաբանել են, որ բանտարկյալին տեղափոխելու համար անհրաժեշտ փաստաթղթերն  ուղղիչ հաստատությունը փոխանցում է Պատիժների իրագործման դաշնային ծառայությանը, որտեղից էլ դրանք ուղարկվում են Արդարադատության նախարարությունը: Նախարարությունում արդեն դրանք ստուգվում են` ըստ Կալանավորների փոխանցման մասին կոնվենցիայի համապատասխանության:

Նախարարությունից հայտնել են՝ անհրաժեշտ փաստաթղթերի ստուգումից հետո Սավչենկոյի տեղափոխման հարցը կորոշվի դատարանով:

Հիշեցնենք, որ ռուսական դատարանը ուկրաինուհի օդաչու, զինծառայող Նադեժդա Սավչենկոյին մեղավոր է ճանաչել Դոնբասում ռուս լրագրողների սպանության գործով և դատապարտել 22 տարվա ազատազրկման: