Նոր մարզադպրոցն ու վերածնվող հայկական գեղասահքը
Հայաստանում մեծ թիվ են կազմում այն մարզաձեւերը, որոնք երկար տարիներ է զրկված են ամենատարրական հնարավորություններից:
Ցավալի է, բայց մեր երկրում, մանավանդ պետական միջոցներով, մարզադպրոցներ շատ քիչ են կառուցվում: Եթե չլինեին Օլիմպիական չեմպիոն Իրինա Ռոդնինայի ակտիվ մասնակցությունն ու Սերգեյ Համբարձումյանի բարեգործական միջոցները, հայտնի չէ, թե որքան ժամանակ հայկական գեղասահքը կշարունակեր մնալ անմխիթար վիճակում:
2015-ի դեկտեմբերից Երեւանում արդեն գործում է Ռոդնինայի անվան գեղասահքի մարզադպրոցը: Mediamax Sport-ը եղել է այնտեղ ու ծանոթացել վերջինիս հնարավորություններին:
Մարզադպրոցում կյանքը եռում է
Դպրոցը գործում է ընդամենը մի քանի ամիս, սակայն այնտեղ տիրող ոգեւորությունն ու աշխուժությունը չնկատել հնարավոր չէ: Սառույցը լի է վառ ու ժպտացող, առաջին քայլերը կատարող փոքրիկներով ու ավելի փորձառու մարզիկներով: Կյանքը մարզադպրոցում եռում է, այստեղ մեծ հույսեր են կապում փոքրիկների հետ ու մտածում գեղասահքի առաջընթացի մասին:
[[gallery1]]
Մարզիչ Էլեն Համբարձումյանը ոգեւորությամբ է պատմում դպրոցի շնորհիվ կարճ ժամանակում հիմնովին փոխված աշխատանքի մասին: Նախկինում երեխաները տարվա մեջ ընդամենը 1-3 ամիս էին կարողանում մարզվել սառույցի վրա՝ Կարապի լճում ու Մարզահամերգային համալիրի սահադաշտում: Այսուհետեւ մարզումները ողջ տարվա ընթացքում են լինելու:
«Նախկինում մենք սահադաշտ չունեինք, նորմալ մարզումներ անցկացնելու հնարավորություն չկար: Մեզ հետ միաժամանակ սահում էին նաեւ ոչ պրոֆեսիոնալները: Պատկերացրեք՝ սահադաշտում միաժամանակ մոտ 50-60 հոգի էր լինում, ու դա չէր կարող չանդրադառնալ մարզումների որակի վրա»,- նշում է նա:
Բնականաբար նախկինում արդյուքների մասին խոսք անգամ լինել չէր կարող: Մասնագետներն ու մարզաձեւի սիրահարներն անում էին հնարավորը, որ գեղասահքը չանհետանա: Առաջիկայում բացթողումները լրացնելու ու նոր տեմպերով գործելու ժամանակն է: Նախ անհրաժեշտ է մարզիչներին վերապատրաստել, քանի որ նրանք երկար տարիներ հնարավորություն չեն ունեցել բարձրացնել իրենց որակավորումը:
Գեղասահքն արվեստ է, որը միաժամանակ նաեւ կոփում է
Առաջին եւ ամենակարեւոր քայլն արդեն կատարված է. հիմա մարզիչների ու երեխաների հետեւողական աշխատանքի հերթն է: Միայն նրանցից են կախված հետագա ձեռքբերումները:
«Մարզադպրոցում ստեղծված են անհրաժեշտ բոլոր պայմանները: Եթե չկարողանանք արդյունք ցույց տալ, ապա դա կլինի միայն մարզիչների մեղքը: Պետք է ճիշտ աշխատել ու արդարացնել սպասելիքները»,- կարծում է Համբարձումյանը:
[[gallery4]]
Մարզիչ Ալինա Բադալյանն էլ նշում է, որ շոշափելի նվաճումների մասին հնարավոր կլինի խոսել մոտ 7 տարի անց, երբ մարզադպրոցի առաջին սաներն արդեն կկարողանան միջազգային ասպարեզում դրսեւորել իրենց: Միջին տարիքի պատանի մարզիկներն էլ մեծ տեմպերով են առաջադիմում ու կարճ ժամանակում յուրացնում մարզաձեւի նրբությունները:
«Գեղասահքը շատ գեղեցիկ սպորտաձեւ, միեւնույն ժամանակ նաեւ արվեստ է: Երեխաները կոփվում են սառույցի վրա, հիվանդություններից հեռու մնում, բացի այդ էլ գեղեցիկ կեցվածք են ձեռք բերում»,- ավելացնում է նա:
Մեծ ակտիվություն ու նպատակային մարզումներ
Շատ կարճ ժամանակում դպրոցը համալրվել է բազմաթիվ սաներով, մի քանի անգամ անցկացված ընդունելութունները ցույց են տվել մարզաձեւի նկատմամբ մեծ հետաքրքրությունը: Ինչպես փաստում է Էլեն Համբարձումյանը, որը հիմնականում փոքրիկների հետ է աշխատում, ընդունել են բոլոր դիմողներին: Եթե երեխաները չեն էլ համապատասխանում պահանջներին՝ սիրողական խմբերում են մարզվում:
[[gallery2]]
«Պլանավորում ենք հաճախակի մրցումներ կազմակերպել ու ստուգել երեխաների ընդունակությունները: Դրանք քննությունների պես կլինեն, եթե կարճ ժամանակ անց արդյունք ցույց տան՝ կմնան սպորտդպրոցում, մյուսները կընդգրկվեն սիրողական խմբերում»,- նշում է մարզիչը:
Գեղասահքից բացի դպրոցում գործում է նաեւ տափօղակով հոկեյի խմբակ, ուր տղաները մեծ սիրով ու հետաքրքրությամբ են հաճախում:
Դպրոցը գործելու նախնական շրջանում մարզումներն ընդհանուր են եղել՝ առանց տարիքային սահմանափակումների: Սակայն մարզիչներն աստիճանաբար հունի մեջ են ընկել, նոր դասացուցակ կազմել ու երեխաներին խմբերի բաժանել: Դա հնարավորություն է տալիս ավելի նպատակային մարզումներ անցկացնել:
«Նմանատիպ բաժանումը շատ կարեւոր է: Փոքրիկները տոտիկ-տոտիկ են սովորում, իսկ ավելի փորձառուները՝ մաշտաբային մարզումներ անցկացնում: Ու արդյունքում նույն սառույցի վա իրար խանգարում են»,- ընդգծում է մարզիչը:
Անթերի սառույց ու սպասվող մրցաշար
Մասնագետները վստահեցնում են, որ սառույցն անթերի է ու համապատասխանում է բոլոր չափանիշներին: Հայաստանում երբեւէ նման լավ սառույց չի եղել ու նախկինում հայ գեղասահորդները հնավորություն չեն ունեցել միջազգային մրցաշարերին պատրաստվել երկրում: Մարզադպրոցի սառույցը հասցրել են փորձարկել Անաստասիա Գալուստյանն ու Սլավիկ Հայրապետյանը, որոնց անվան հետ է վերջին տարիներին կապվում հայկական գեղասահքը: Մարզիկները գոհ են մնացել ու խոստացել են խոշոր մրցաշարից առաջ Երեւանում եւս պատրաստվել:
[[gallery3]]
Առաջիկայում մարզադպրոցում նաեւ մրցումների հետեւելու հնարավորություն կլինի: Մայիսին Հայաստանի բաց առաջնություն կանցկացվի, որտեղ իրենց ուժերը կչափեն տարբեր երկրներից ժամանակ մարզիկներ: Իսկ արտասահմանցի մրցավարների հետ աշխատանքն էլ հնարավորություն կտա տեղացի մասնագետներին փորձ ձեռք բերել:
«Այդ առաջնությունից մեծ ակնկալիքներ ունենք, արդեն բանակցություններ ենք վարում, որ շատ մասնակիցներ ունենանք»,- նշում է Համբարձումյանը, որը թեեւ մասնագիտությամբ իրավաբան է ու երկար տարիներ աշխատել է այդ ոլորտում, հանուն սպորտի այն 2-րդ պլան է մղել, քանի որ հավատում է գեղասահքի առաջընթացին ու առաջիկա նվաճումներին:
Հասմիկ Բաբայան
Լուսանկարները՝ Էմին Արիստակեսյանի