İKTA internet operator və provayderlərinin veb-saytlarının təhlilini həyata keçirib
Azərbaycanın telekommunikasiya və poçt xidmətləri üzrə tənzimləyici qurumu İnformasiya Kommunikasiya Texnologiyaları Agentliyi (İKTA) internet telekommunikasiya xidmətləri göstərən operator və provayderlərin veb-saytlarının təhlilini həyata keçirib.
Müxtəlif kateqoriyalar üzrə təhlillər ümumilikdə bazarın 90%-dən çox hissəsini əhatə edən 26 operator və provayderin internet informasiya ehtiyatları üzrə aparılıb.
Bu operator və provayderlərə “AG Telekom” MMC, “Alfanet” MMC, “Azoptiknet” MMC, “AzQtel” MMC, “Aztelekom” MMC, “Aznet Technologies” QSC, “Azeronline LTD” BM, “Araznet Technologies” MMC, “BeeOnline” MMC, “Boss Group” MMC, “Eurosel” MMC, “Fast Net Technology” MMC, “Fibernet” MMC, “GammaSkynet” MMC, “GSP” MMC, “Kaspian Telekom” MMC, “Konnekt” QSC, “Metronet” MMC, “Rahat Telecom” MMC, “Selnet” MMC, “Setnet” MMC, “Smart Sistemz Technoloji” MMM, “SN Telecom” MMC, “Telekom İnvest” MMC, “Teleport” MMC və “Uninet” MMC daxildir.
Müəyyən edilib ki, qeyd edilən operator və provayderlərin saytlarının 22-də kommersiya istifadəçiləri üçün aylıq internet tarifləri ilə onlayn tanış olma imkanı mövcuddur, 19-da internetə qoşulma haqqını elektron ödəniş üsulları ilə ödəmək mümkündür, 14-də internet xidmətləri ilə bağlı problemləri bildirmək üçün internet xidməti provayderi səviyyəsində şikayət mexanizmi var.
Eyni zamanda saytların 13-də yeni internet bağlantısı üçün tələb olunan addımlarla bağlı məlumatın yayımlandığı, 12-də “E-Şikayət” sistemi ilə bağlı məlumatın, 12-də internetə qoşulma üçün tələb olunan sənədlərin siyahısının, 7-də “SpeedTest” ölçmələri üçün keçidin yerləşdirildiyi müəyyən olunub.
Həmçinin təchizatçıların saytlarının 8-də internet hesab-fakturasının ümumi məbləğinə daxil olan komponentlərin istifadəçilərə izah edildiyi, 2-də yeni internet qoşulmasına tamamilə onlayn şəkildə müraciət etməyin mümkün olduğu, 1-də yeni istifadəçinin internet xidmətinə qoşulması üçün təxmini müddət barədə məlumatın yerləşdirildiyi, 1-də şikayətdə bildirilə bilən problemlərin növünün qeyd edildiyi, 1-də isə planlaşdırılan internet kəsintilərinin istifadəçilərə əvvəlcədən ictimai elanlar və ya birbaşa bildiriş vasitəsilə çatdırıldığı məlum olub. Bundan əlavə, yalnız 1 provayderin saytında şikayət etmək üçün lazım olan sənədlərin siyahısı yerləşdirilib.
Təhlil aparılmış internet operator və provayderlərin veb-saytlarında yeni internet xidmətinə qoşulma prosesinin statusunun izlənilməsi, aylıq internet tariflərindəki dəyişikliklər barədə istifadəçilərin ən azı bir hesablaşma dövrü əvvəlcədən məlumatlandırılması və şikayət prosesinin bir hissəsi olan addımlar haqqında məlumatın verilməsi xidmətləri mövcud deyil.
Aparılan təhlillərin nəticələri toplanaraq mövcud çatışmazlıqların aradan qaldırılması üçün müvafiq olaraq operator və provayderlərə təqdim edilib.
İKTA bir daha bəyan edir ki, telekommunikasiya və poçt rabitəsi sahəsində istehlakçı hüquqlarının qorunması və rəqabətli mühitin formalaşması üçün fəaliyyətimizi davam etdirəcəyik.
| İnternet operator və provayderlərinin rəsmi veb-saytları üzrə | Mövcuddur | Mövcud deyil |
| Veb-sayt | 26 | 0 |
| Kommersiya istifadəçiləri üçün aylıq internet tarifləri ilə onlayn tanış olma imkanı | 22 | 4 |
| İnternetə qoşulma haqqını elektron ödəniş üsulları ilə ödəmə | 19 | 7 |
| İnternet xidmətləri ilə bağlı problemləri bildirmək üçün internet xidməti provayderi səviyyəsində şikayət mexanizmi | 14 | 12 |
| Yeni internet bağlantısı üçün tələb olunan addımlarla bağlı məlumat | 13 | 13 |
| “E-Şikayət” sistemi ilə bağlı məlumat | 12 | 14 |
| İnternetə qoşulma üçün tələb olunan sənədlərin siyahısı | 12 | 14 |
| “SpeedTest” ölçmələri üçün keçid | 7 | 19 |
| İnternet hesab-fakturasının ümumi məbləğinə daxil olan komponentlərin istifadəçilərə izahı | 8 | 18 |
| Yeni internet qoşulmasına tamamilə onlayn şəkildə müraciət imkanı | 2 | 24 |
| Yeni istifadəçinin internet xidmətinə qoşulması üçün təxmini müddət barədə məlumat | 1 | 25 |
| Şikayətdə bildirilə bilən problemlərin növü | 1 | 25 |
| Planlaşdırılan internet kəsintilərinin istifadəçilərə əvvəlcədən ictimai elanlar və ya birbaşa bildiriş vasitəsilə çatdırılması | 1 | 25 |
| Şikayət etmək üçün lazım olan sənədlərin siyahısı | 1 | 25 |
| Yeni internet xidmətinə qoşulma prosesinin statusunun izlənilməsi | 0 | 26 |
| Aylıq internet tariflərindəki dəyişikliklər barədə istifadəçilərin ən azı bir hesablaşma dövrü əvvəlcədən məlumatlandırılması | 0 | 26 |
| Şikayət prosesinin bir hissəsi olan addımlar haqqında məlumat |
0 | 26 |
The post İKTA internet operator və provayderlərinin veb-saytlarının təhlilini həyata keçirib appeared first on InfoCity.