Կանանց առաջարկում են 1 միլիոնի դիմաց ծառայել բանակում
Կառավարությունը նախատեսում է ներդնել «իգական սեռի քաղաքացիների կամավոր հիմունքներով պարտադիր զինծառայության համակարգ»: Օրենքի նախագիծն այսօր կառավարության նիստի ժամանակ ներկայարել է պաշտպանության նախարար Սուրեն Պապիկյանը, կառավարությունն էլ հավանություն է տվել նախագծին։
Ծառայությունը կտևի 6 ամիս։ Ըստ նախագծի՝ պարտադիր ծառայության դիմած կանանց ընտանեկան պայմաններից ելնելով վաղաժամկետ արձակման հնարավորություն չի տրվելու, սակայն մինչև զորակոչի օրը նրանք կարող են հրաժարվել ծառայությունից:
Վարչապետի հարցին՝ եթե կանանց համար կամավոր է զինվորական ծառայությունը, ինչու են նախագծի անունը դրել պարտադիր՝ Պապիկյանը պարզաբանել է, որ կամավոր է մինչև զորակոչվելու պահը, իսկ 6 ամիս ժամկետը դառնում է պարտադիր։
«Զորակոչված իգական սեռի ներկայացուցիչներն, առանց վիճակահանության, նշանակվում են ուսումնական զորամասեր և նրանց ծառայությունն իրականացվում է բացառապես այդ զորամասերում։ Ծառայության 6-ամսյա ժամկետը լրանալու կամ մինչև լրանալն առողջական վիճակի պատճառով վաղաժամկետ զորացրվելու դեպքում, ստանալու են պատվովճար, որը նախատեսվում է սահմանել 6 ամիսը լրիվ ծառայելու պարագայում 1 միլիոն դրամ, իսկ վաղաժամկետ զորացրվելու դեպքում նշված գումարը 6 ամսվա բաժանելու և փաստացի ծառայած ամիսների թվով բազմապատկելու արդյունքում ստացված չափով», – ասել է Պապիկյանը։
Կանայք նաև իրավունք կունենան 6-ամսյա ծառայության հիմքով զորացրվելու փոխարեն «Պաշտպան հայրենյաց» ծրագրով դիմել և անցնել 5 տարի ժամկետով պայմանագրային զինվորական ծառայության։
Փաշինյանի խոսքերով՝ նախագիծը քննարկվում է պրոֆեսիոնալ բանակ ունենալու հայեցակարգի շրջանակներում։
«Մեր տրամաբանությունն այն է, որ դա լինելու է նորմալ ծառայություն, դա չի լինելու զբոսանք զորամասում», – ասել է վարչապետը։
Ըստ Սուրեն Պապիկյանի՝ մինչև այս նստաշրջանի ավարտը կկարողանան Ազգային ժողովում օրենքն ընդունելու գործընթացն ավարտել, իսկ արդեն ձմեռային զորակոչի ընթացքում իրականացնել նաև կամավոր ծառայություն անցնելու ցանկություն հայտնած կանանց զորակոչը։
The post Կանանց առաջարկում են 1 միլիոնի դիմաց ծառայել բանակում first appeared on Epress.am.