Ат елында туучылар: «Башлаган эшне иртәме-соңмы ахырына җиткерәм»

Яңа елны һәркем зарыгып көтә, киләсе елның тагын да уңышлырак булуына ышана, якты өметләр баглый. Ел матур, якты хатирәләргә бай булсын өчен, аны ничек каршы алырга кирәк икән соң?!

Көнчыгыш календаре буенча 2026 ел (17 февральдән башлап) Кызыл Утлы Ат билгесе астында узачак. Бу – 60 еллык циклдагы иң куәтле, энергияле һәм көтелмәгән вакыйгаларга бай билгеләрнең берсе. Астрологлар бертавыштан раслый: 2026 ел глобаль трансформацияләр елы булачак.

Ут – ул дәрман, прогресс һәм чистарыну символы, ә Ат – ирек, түземлек һәм туктаусыз алга омтылуны гәүдәләндерә. 2026 елда вакыйгалар бик тиз үсеш алачак. Бу ел ашыгырга яратмаучылар өчен түгел. «Уңышка тиз карар кабул итүчеләр һәм курку белмәүчеләр ирешәчәк.

Бизнес өчен 2026 ел экспансия (киңәю) чоры булачак. Утлы Ат яңа стартаплар башлаучыларга һәм үз белемен арттыручыларга ярдәм итәчәк. Шул ук вакытта сак булырга да кирәк: елның импульсив энергиясе уйланылмаган чыгымнарга этәрә ала. Төп киңәш – азартка бирелеп, мантыйкны югалтмагыз.

Шәхси тормышка килгәндә, бу ел – ярсулы хисләр һәм кайнар мәхәббәт елы. Танышулар тиз булачак, ләкин мөнәсәбәтләрне саклап калу өчен түземлек кирәк. Ат ирекне ярата, шуңа күрә бу елны бигрәк тә гаиләдә бер-береңне «кысмыйча», ирек бирү мөһим.

Ат елында туган дөньякүләм танылган кешеләр арасында: Джеки Чан, Пол Маккартни, Харрисон Форд, Эмма Уотсон, Джон Траволта, Кристен Стюарт, Майк Тайсон, Коби Брайант, Любовь Успенская, Нюша, Леонид Ярмольник, Григорий Перельман һәм башкалар.

Татарлардан: Халидә Бигичева, ИлСаф, Айдар Рәкыйпов, Алия Мөбәрәкова, Динар Хөснетдинов, Рамил Шәрәпов, Алина Заһитова,

«Киләсе ат елына әллә ни зур өметләр багламыйм»

Ат елында туган иҗат кешеләренең киләсе елга нинди өметләр баглавы турында үзләреннән сораштык.

Айдар Рәкыйпов:

Быелгы ел нәрсәсе белән истә калды, дигәндә, беренчедән, мин өйләндем. Икенчедән, быел магистратура бүлеген кызыл дипломга тәмамладым. Иң истә калган вакыйгалар шушы булды.

Киләсе елда исә март аенда Казанда филармония концертлар залында минем «сольный» концертым булачак. Шуңа әзерләнәбез, әле башка район-шәһәрләргә дә чыгарга уйлыйбыз. Мин 3 ел чыгышлар гына ясап йөрдем, «сольный» концертларым булмады. Тамашачыларым бик сорый, көтә, шуңа концертлар булачак, Аллаһ боерса.

Ат елында туган кешеләр нинди сыйфатларга ия, дигәндә, бу, беренче чиратта, кешенең нинди гаиләдә тууы, ничек тәрбияләнүе белән бәйле, дип уйлыйм. Бу сорауга төгәл җавап та биреп булмый. Бәлки, көчлерәк, сабыррак булалардыр. Ат бит – тырыш, матур, бар нәрсәгә түзә торган хайван. Әмма, түзә, дигәч тә, бөтен нәрсәгә түзеп яшәргә кирәк, дигән сүз түгел.

Концертка әзерләнүләр, чыгышлар, тормыш мәшәкатьләре белән, Яңа елны төгәл кайда каршы алачагыбызны әйтә дә алмыйм. Шунысын әйтә алам, гаиләм белән булачакмын. Минемчә, Яңа ел ул – гаилә бәйрәме, шуңа йә тормыш иптәшем белән икәү генә, йә әти-әниләр белән бергә каршылыйбыз. Хәзер анда-монда йөрисе дә килми, тыныч кына өйдә, җылы мохиттә, телевизор карап, тәмле итеп ашап, якын кешеләр белән үткәрәсе килә.

Киләсе ел ат елы буласын белмәгән идем дә, Аллаһ боерса, безнең ел була. Әйбәт булыр, дип ышанып калам.

Алып баручы, җырчы Алия Мөбәрәкова:

Киләсе ат елына әллә ни зур өметләр багламыйм. Мин хәзер үземә бервакытта да зур-зур хыяллар куймыйм, чөнки аларга ирешәм дип, югалып бетү ихтималы бар. Алдыма куйган кечкенә генә өметләрне аклап, тыныч күңел белән сәламәт яшәргә язсын. Яшь барган саен шунысын аңлыйсың, сәламәтлек бик кирәк икән.

Ат елында туган кешеләр нинди сыйфатларга ия, дигәндә, үземнән чыгып әйтә алам, мин башлаган эшне иртәме-соңмы ахырына җиткерәм, детальләргә вакланырга яратам. Мин – тырыш кеше, бу – ат елында тууым белән бәйлеме, белмим.

Яңа елны, Аллаһ боерса, туган ягым Кукмарада әти-әниләр, туганнар, балаларым белән каршы алам.

Һәр елны Яңа ел табынына әзерли торган «фирменный» рецептыбыз да бар, бу – «Оливье» салаты. Кызымны да аны ясарга өйрәттем, хәзер ул – аның яраткан салаты.

«Оливье», «Тун астында селедка» салатлары, пилмән һәм бәлеш – безнең Яңа ел табынының төп ризыклары.

Ат елында булган истәлекле вакыйгалар:

• 1930 ел - СССРда коллективизация дәвам итә
• 1942 ел - Бөек Ватан сугышы тарихында Сталинград оборонасы
• 1954 ел - СССР НАТОга керү теләген белдерә
• 1966 ел - СССР орбитага беренче тапкыр айның ясалма иярченен җибәрә
• 1978 ел - Советлар Союзында куркыныч салкыннар була
• 1990 ел - Горбачев СССРның беренче президенты итеп сайлана
• 2002 ел - Росиядә Җинаять кодексына үзгәрешләр кертелә
• 2014 ел - Кырым Россиягә кушыла
• Ә 2026 ел тарихка нинди вакыйгалар белән кереп калыр?