Матурлык бәйгесендә мода күрсәтү: подиум буйлап бер-бер артлы сылу чибәркәйләр атлый

Монда төп тамашачылар – Халыкара матурлык һәм нәфислек бәйгесендә катнашучылар үзләре, делегацияләрнең җитәкчеләре, йолдызлы кунаклар һәм мода индустриясе вәкилләре булды.

Бу дефиле – милли мотивлар белән заманча моданың камил синтезы булды. Россия һәм Татарстан дизайнерлары үз коллекцияләрендә илебезнең мәдәни байлыгын чагылдырырга омтылган. Шунысын да баштан ук әйтеп куям: әгәр шкаф төбендә ситса күлмәк яки чалбар ята икән – алар яңадан модага кайта!

Тамаша прологтан башланды. Подиумда гадилек, спорт стиле һәм күпләр яраткан «оверсайз» (киң) формалар өстенлек итте.

Чараны алып баручы бу конкурсның БРИКС илләре өчен мөһим мәдәни вакыйга булуын ассызыклады

Алга таба исә сүзне Татарстан Республикасы Мәдәният министры Ирада Әюпова алды. Әйтергә кирәк, ул җыйнак кына кара күлмәктән иде, ләкин образына бер шармны – энҗе муенсасы биреп торды.

Хәерле кич, хөрмәтле кунаклар һәм бәйгедә катнашучылар! Миллион еллар элек, кешелек дөньясы белән бергә «матурлык» төшенчәсе барлыкка килгән. Уңайлы булу-булмавына карамастан, кеше матур торак сайлый, чөнки ул алга таба яшәргә дәрт тудыра. Һәм һәр халык үзенең кояшын, күк йөзен күреп, үзенең матурлыгын сурәтләгән.

Матурлык вакыт белән үзгәрә. Ләкин еллар, гасырлар аша үзгәрешсез кала торган матурлык бар. Кеше гомере беткәч тә, бу матурлык юл күрсәтүче йолдыз булып кала. Бу – күңел матурлыгы, калеб гүзәллеге. Кадерле катнашучылар, сез – күк йөзендәге якты йолдызлар кебек. Күңелегездәге бу ялкын беркайчан да сүнмәсен, сүрелмәсен! – диде министр.

Журналистларның күренекле стилист, моңарчы телеэкраннардан гына күреп белгән Влад Лисовец белән аралашу мөмкинлеге булды. Ул быелгы язда ниләр модада булачагын сөйләде.

– Һичшиксез, гәүдәгә туры килеп торган, бик нык ялтыравыклы жакетлар. Һәм, бер генә сүз белән әйтсәм – элегантлык. Пикантлык та мөһим роль уйный, – дип белдерде Лисовец үзенең жакет-пиджаклары турында да күз кысып.

Менә мода күрсәтү тамашасы башланды. Подиум буйлап бер-бер артлы сылу чибәркәйләр атлый. Подиум да һәръяклап яхшы күренә иде.

Дефиленың беренче минутларда ук милли мотивлар белән сугарылган көйләр яңгырады. Мәсәлән, «Кыз бала» җыры. Беренче модель кыз ялтыравыклы тоташ костюмнан үтте. Көмеш һәм алтынсу төсләрдәге мондый костюмнар фигураның нәфислеген – күкрәк турлары һәм җиләкләре гүзәллеген күрсәтә. Күз карашын үзенә тартып тора.

Ботфорт та – мәңгелек тема инде ул. Аларын да күрдек. Елның-елында әйләнә дә кайта модага. Тик, аның да нечкә үкчәлесе генә матур, ә калын төплеләре солдат аяк киеме кебек...

Көндәлек яисә спорт белән шөгыльләнер өчен кроп-худи һәм джоггерлар да тәкъдим ителде. Аларны берникадәр оверсайз стилендә иде.

Ә ир-егетләр өчен модельләр олимпийка, лонгслив, шортылар, шулай ук клеш-чалбарлар күрсәтеп уздылар. Барысы да ак төстә, сөйгәне яисә хатыны булмаган ир затына аны атна саен юу да проблема инде ул… Шулай да, үзем дә алып киярдәйләрен шәйләп алдым.

Язгы куртка, плащлар модасын да тамаша кылдык. Кызык булып китте әле, олы кием-салым мода индустриясендә күтәрелүен дәвам итә. Бер сылукай киеп чыккан плащ – минем нәнәмнең чоланындагы поши мөгезләренә эленеп куелган иде. Җитмәсә, төсе дә туры килеп тора, кызлар! Плащларда да, курткаларда кабартылган җиңнәр. Алары ничектер кызларга сөйкемлелек өстәп тора. Бомбер, куртка-трансформерлар да актуаль булып кала.

Милли бизәкле киемнәр кигән кызлар һәм егетләрне дә күрдек.

Ситса гына дияргә ашыкмагыз! Ситса күлмәкле кызларны да булды. Әйбәт тукыма, тән дә сулый.

Ахырдан хиҗаблы гүзәл затлар чыкты. Озын кара күлмәкләр, юбкалы костюмнар… Матур, ошады. Кара төсне күп кеше үз итмәсә дә, ул хатын-кызга серлелек өсти торган төс, дип саныйм.

Татарстан дизайнерларының киемнәрен күрсәтү вакытында сәхнәдә «Дышать» төркеме һәм Defne чыгыш ясады. Аннан соң DINARA үзе генә дә чыгып җырлады.

Әйткәнемчә, монда бик күп танылган шәхесләр җыелган. Алар аерылып тора диимме соң. Танылган футболист Дмитрий Тарасов һәм аның хатыны телевидение алып баручысы, модель Анастасия Костенколарны әйтеп була җәһәттән.

Безгә бик ошады, шулкадәр масштаб! Бу – чын фурор тудырган чара! Минем Дөньякүләм Мисс конкурсында катнашу тәҗрибәм бар, әмма БРИКС матурлык бәйгесе бөтен булганнарыннан да югарырак дәрәҗәдә, искиткеч затлы итеп оештырылган. Илебездә шундый мәртәбәле конкурс оештырылганга нык шат һәм горурмын. Киләчәктә күп тапкырлар оештырылып торсын! Мин оештыручыларның осталыгына шаккатам. Монда Миссис, Мисс һәм Мини Мисс сайланачагы да игътибарга лаек – бу буыннар чылбырының ачык мисалы, – дип белдерде Анастасия.

Аннары сәхнәгә кино һәм театраль рольләре аша күпләребезгә билгеле актриса Наталья Бардо менде. Ул да Халыкара чараның әһәмиятен билгеләде һәм оештыручыларны мактап телгә алды.

Эшләре күренекле стилист, визажист һәм бьюти-блогер Гоар Аветисянныкын хәтерләткән билгеле визажист, клиентлары эстрада, шоу-бизнес йолдызлары булган Акобир Ашуркулович та биредә иде. Визажист дигәннән барлык модельләрнең дә макияжлары гаять тыйнак тоелды, бөтен игътибар киемнәргә юнәлтелгән.

Хатын-кыз матурлыгы – эчке һәм, әлбәттә, аңа гына хас булган энергиядән тора. Елмаю, йөреше, гәүдә торышы... Аңа карыйсың һәм уйлыйсың – бу сексуаль, – диде ул сәхнәдән фикерләре белән бүлешкән чакта.

Дефиле турында стилист Лисовец болай диде:

Модельләр соклангыч, сүзем юк. Аннан, ситса, гаҗәеп булды ул. Аңардан кемдер тегәргә һәм подиумга чыгарырга җөрьәт иткән икән – бу кешегә алкышлар яудырырлык, – диде мода белгече.

Мода күрсәтүдән башланган кичә Полина Гагарина чыгышы һәм дискотека белән тәмамланды. Ул сәхнәгә алтынсу төстәге, тирән декольтелы һәм шактый ачык күлмәктән чыкты. Образын биек үкчәле туфлиләр һәм зур гына алкалар тулыландырган иде. Җырчы «Спектакль окончен», «Драмы больше нет», Цойның «Кукушка» кебек җырларын башкарды.

Ә үземнең фикергә килгәндә, бик ошады. Сүз тидерерлек түгел, шуңа күрә дә кайсыбер дизайнер вә стилистларның иҗатына катырак, астыртынрак бәрелгәнмен икән – зинһар гафу итсеннәр дә, ачулана күрмәсеннәр берүк.

Дефиле дәвамында, сылу һәм зифа буйлы кызларга сокланмыйча да булдыралмадым. Яныңнан калмый йөргән сылуың булса да, бу чәчкәләргә күз төшермичә булмый. Гаеп итеш кенә булмасын. Бөтенләй гыйшык утында янарлык ук булмасаң да, модельләр кызарып пешкән алма кебек инде.