Toyota янги баскетболчи роботини тақдим этди (видео)

Toyota Motor Corporation 12 апрель куни ўзининг одамсимон баскетболчи роботининг янги авлоди — CUE7 моделини жамоатчиликка намойиш этди. Қурилма сўнгги уч йил ичида илк бор омма олдида кўрсатилди, деб хабар берди “Nikkei Asia”.

219 сантиметр баландликдаги робот икки ғилдиракли ҳаракат платформаси ва баскетбол тўпини ушлаб, аниқ улоқтиришга мўлжалланган махсус манипуляторлар билан жиҳозланган. Токио шаҳрида ўтказилган баскетбол ўйини пайтида CUE7саҳнага чиқиб, тўпни муваффақиятли саватга ташлади.

Янги авлод роботининг асосий янгилиги — сунъий интеллект асосидаги мустаҳкамловчи ўқитиш (reinforcement learning) технологиясидир. У аввалгиларидан фарқли равишда олдиндан дастурлаш эмас, балки АИ орқали ўз тажрибаси асосида тўп улоқтиришни ўрганади.

Муҳандислар унинг конструкциясини ҳам янгилаган: тўрт ғилдирак ўрнига икки ғилдиракли тизим қўлланилиб, оғирлик тахминан 40 фоизга камайтирилган ва 74 килограммгача туширилган. Робот лидар сенсори, стереоскопик камера ва бир нечта аниқлик датчиклари билан жиҳозланган бўлиб, Toyota пойга автомобиллари технологиясидан олинган батареялар билан ишлайди.

Маълумот учун, CUE лойиҳаси 2017 йилдан бери ривожланиб келмоқда. Олдинги CUE3 модели кетма-кет тўпни 2020 та аниқ отиш рекорди билан, CUE6 эса 24,55 метр масофадан аниқ зарба бериш натижаси билан машҳур бўлган.