АҚШ ва Эрон ўртасида вақтинчалик сулҳ тузилди
Жаҳон сиёсат майдонида кутилмаган, аммо муҳим бурилиш юз берди. АҚШ Президенти Доналд Трамп Эрон билан икки ҳафталик оташкесим режимига келишилганини эълон қилди. Покистон воситачилигида эришилган ушбу келишув минтақадаги кенг кўламли уруш хавфини вақтинча бўлса-да чеклади.
Томонлар ўзаро ҳарбий ҳаракатларни 14 кунга тўхтатиб, бу вақтдан узоқ муддатли тинчлик битимини имзолаш учун фойдаланишади.
Эрон дунё энерготизими учун стратегик аҳамиятга эга бўлган Ҳормуз бўғози орқали кемаларнинг "хавфсиз ўтиши"ни таъминлашга ваъда берди.
Жума куни Исломободда (Покистон) икки давлат делегациялари ўртасида тинчлик музокаралари бошланиши кутилмоқда. АҚШ делегациясига вице-президент ЖД Венс бошчилик қилиши айтилмоқда.
Хабар эълон қилиниши билан жаҳон молия бозорлари ижобий муносабат билдирди. Хусусан, нефт нархи 6% га тушди, Америка фонд бозори кўрсаткичлари (С&П 500) эса ўсишни бошлади.
Бу гарчи Вашингтон ва Теҳрон келишувга эришган бўлса-да, Исроил ва Ливан йўналишида вазият ҳамон чалкашлигича қолмоқда. Исроил Бош вазири Нетаняху Эрон билан боғлиқ масалада сулҳга амал қилишини билдирди, бироқ Ливандаги операциялар бўйича аниқ тўхтамга келинмаган.
Президент Трамп ушбу келишувни "Яқин Шарқдаги узоқ муддатли тинчлик сари улкан қадам" деб атаган бўлса, Эрон томони буни Покистоннинг "биродарларча ҳаракати" ва ҳарбий эскалацияни тўхтатиш имконияти сифатида баҳоламоқда.