Эронда уриб туширилган Ф-15 самолётининг иккинчи экипаж аъзоси АҚШ кучлари томонидан қутқарилди
АҚШ махсус кучлари Эрон устида уриб туширилган Ф-15 жанговар самолётининг иккинчи экипаж аъзосини қутқариб олди. Бу ҳақда уч нафар АҚШ расмийсига таяниб Ахиос нашри хабар берди.
Экипаж аъзоси — қурол тизимлари оператори — жума куни самолётдан катапулта билан чиқиб кетгач жароҳат олган, аммо юришга қодир бўлган ва бир суткадан ортиқ вақт давомида тоғларда қўлга тушмасдан яшириниб юрган, деди расмийлардан бири.
Самолётнинг уриб туширилиши АҚШ ҳарбийлари учун энг ёмон сценарийлардан бири бўлган. Шу билан бирга, Ислом инқилоби қўриқчилари корпуси ҳам Эроннинг жануби-ғарбида йўқолган америкалик ҳарбийни топиш учун ҳаракат қилган. Ҳар икки экипаж аъзоси Эрон ҳудудида ўтказилган махсус операциялар орқали қутқарилган.
Расмийлардан бирининг айтишича, шанба кунги операция махсус бўлинма томонидан, кучли ҳаво қўллови остида амалга оширилган. АҚШ кучлари кучли ўт очган ва ҳозирда барча ҳарбийлар Эрон ҳудудидан чиқиб кетган.
Икки манбага кўра, Ф-15 учувчиси ва қурол тизимлари оператори жума куни катапултадан чиққач алоқа воситалари орқали бир-бири билан боғлана олган.
Учувчи самолёт уриб туширилганидан бир неча соат ўтиб қутқарилган. Шу операция вақтида Эрон АҚШнинг Blackhawk вертолётига зарба берган, натижада экипаж аъзолари жароҳат олган, аммо вертолёт парвозни давом эттира олган.
Қурол тизимлари операторини топиш ва қутқариш учун эса бир суткадан кўпроқ вақт кетган.
Операторнинг аниқ жойлашуви аниқланишидан олдин АҚШ Марказий разведка бошқармаси чалғитувчи кампания ўтказган. Улар Эрон ичида АҚШ кучлари аллақачон уни топгани ва ер орқали олиб чиқишга уринаётгани ҳақида ёлғон маълумот тарқатган.
Шу пайтда, АҚШ Марказий разведка бошқармаси уни топиш учун “ноёб имкониятлар”дан фойдаланган.
“Бу худди пичан ичидан игна излашдек эди, фақат бу сафар у тоғ ёриғида яширинган жасур америкалик эди,” деди расмий.
АҚШ Марказий разведка бошқармаси унинг аниқ жойлашувини Пентагон, АҚШ армияси ва Оқ уйга етказган, шундан сўнг президент Доналд Трамп зудлик билан қутқарув операциясини буюрган.
Икки нафар АҚШ расмийсига кўра, Ислом инқилоби қўриқчилари корпуси ҳам қутқарувни тўхтатиш учун ҳудудга кучлар юборган.
АҚШ ҳарбий-ҳаво кучлари Эрон кучларининг ҳудудга етиб келишини олдини олиш учун зарбалар берган.
Трамп Truth Social тармоғида қутқарувни тасдиқлаб, уни “АҚШ тарихидаги энг жасоратли қидирув ва қутқарув операцияларидан бири” деб атади.
Унинг айтишича, зобит жароҳат олган, аммо “тезда соғайиб кетади”.
“Бу жасур жангчи душман ортида, Эроннинг хавфли тоғларида яшириниб, душманларимиз томонидан соат сайин яқинлашиб борилаётган эди,” — деб ёзди Трамп.
Оқ уй расмийсининг айтишича, Трамп шанба куни давомида Овал кабинетда бўлган ва Пет Ҳегсетдан доимий равишда янгиланишлар олиб турган.