Ароқчи: АҚШ қуруқликдан ҳужум қилса, оғир йўқотишга учрайди

Эрон ташқи ишлар вазири Аббос Ароқчи АҚШнинг мамлакат ҳудудига қуруқлик орқали ҳарбий аралашуви эҳтимолига муносабат билдирди. Унинг таъкидлашича, бундай қадамга Вашингтоннинг журъат этиши жуда ҳам шубҳали.

Ароқчи ўз баёнотида АҚШ томони эҳтимолий ҳужум оқибатларини яхши англаб етганини урғулади. “Улар бундай қарор қабул қилади, деб ўйламайман. Агар шундай бўлса, уларни жуда катта йўқотишлар кутади”, — деди вазир.

Шу билан бирга, у сўнгги тўқнашувларда АҚШ ҳарбий инфратузилмасига етказилган зарарларга ишора қилди. Хусусан, разведка ва ҳаво кузатув тизимлари, жумладан AWACS самолётлари билан боғлиқ ҳолатларни эслаб ўтди.

Вазирнинг фикрича, қуруқликдаги эҳтимолий ҳарбий ҳаракатлар Эрон учун янада қулайроқ сценарий ҳисобланади. “Қуруқликдаги жангларда биз анча устунмиз”, — дея таъкидлади у.

Баёнот якунида Ароқчи мамлакат ҳар қандай ташқи таҳдидга тайёр эканини билдирди. Унинг айтишича, Эрон армияси ва мудофаа тизими ҳудудий хавфсизликни таъминлаш учун етарли имкониятларга эга.

Мутахассислар эса бундай кескин баёнотлар минтақадаги геосиёсий вазиятни янада таранглаштириши мумкинлигини қайд этмоқда.