Гвардиола таркибни тасдиқлади: Ҳусанов “Реал”га қарши ўйинга тушадими?

Европа Чемпионлар лигасида баҳор ҳавоси билан бирга катта интрига ҳам қайтди. 1/8 финал доирасида “Манчестер Сити” навбатдаги синовини айнан футбол тарихининг энг “оғир саҳналари”дан бири — “Сантьяго Бернабеу”да қабул қилади. Рақиб эса одатдагидек — “Реал”. Бу жуфтлик сўнгги йилларда аллақачон Чемпионлар лигасининг классикасига айланиб улгурган.

Йўлнинг боши “Этиҳад”даги ишончдан бошланган

“Шаҳарликлар” қитъанинг энг нуфузли мусобақасидаги мавсумни Италия чемпиони “Наполи”га қарши 2:0 ҳисобидаги ғалаба билан бошлаган эди. Шу баҳсдаги ишончли ҳаракат, жамоага керакли руҳий устунликни берди. Бу орада Эрлинг Холанд ҳам мусобақада 50 голга энг тез етган футболчига айланиб, яна бир катта рекордга қўл урди.

Лекин мавсум ўртасида “Сити” учун ҳам қаттиқ даврлар бўлди: ўз уйида “Байер”га 0:2 ҳисобида мағлубият, Норвегияда лига сенсацияси “Будё-Глимт”дан 1:3 ҳисобида ютқазиш — булар жамоа учун оғриқли дарслар сифатида ёдда қолди.

Гуруҳ босқичида барқарор қадамлар

Шунга қарамай, умумий гуруҳ босқичида Гвардиола шогирдлари бир неча рақибни ортда қолдирди: “Боруссия Дортмунд”, “Вильярреал” ва “Галатасарой” устидан ғалабалар қайд этилди, “Монако” билан эса 2:2 ҳисобида дуранг қайд қилинди.

Кўпчилик фикрича, ҳал қилувчи палла декабрь ойида “Бернабеу”да “Реал”га қарши ўтказилган ўйин бўлган. Родригонинг эрта голига қарамай, “Сити” ўша баҳсда тажриба ва хотиржамлик кўрсатган: Нико О’Райли жамоани ўйинга қайтарган, Холанд эса пенальтини аниқ бажариб, бурилиш ясаган. Шу натижа “Сити”га кучли саккизликка кириш имконини бериб, 1/16 финал плей-оффидан қутқаргани таъкидланмоқда.

Яна “Реал” ва яна бир тарихий серия

Энди 1/8 финалда “Сити” яна “Реал”га дуч келди. Бу — охирги етти йилда икки жамоа ўртасида бўладиган 12-учрашув. Яъни бу рақобатда ҳеч нарса “тасодиф” эмас: ҳар бир деталь, ҳар бир эпизод баҳс тақдирини ўзгартиради.

Гвардиола тасдиқлаган 23 нафарлик рўйхат

Хосеп Гвардиола Испания сафари учун қуйидаги таркибни тасдиқлади:

— Дарвозабонлар: Доннарумма, Траффорд, Беттинелли.
— Ҳимоячилар: Нуньеш, Аллейн, Ҳусанов, Гехи, Стоунз, Диас, Аке, Айт-Нури.
— Ярим ҳимоячилар: Родри, Нико, О’Райли, Рейндерс, Бернарду, Шерки, Фоден.
— Ҳужумчилар: Семеньо, Савио, Мармуш, Холанд, Доку.

Жамоага энг муҳим хабар — Холанд сафга қайтди. Йошко Гвардиол эса ҳали ҳам жароҳатини даволатмоқда. Сўнгги ҳафталарда “Сити”даги жароҳатлар билан боғлиқ муаммолар анча юмшаганини ҳам қайд этиш мумкин.

Шанба куни “Ньюкасл”га қарши ўйинда дам олган Холанд Мадридга йўл олган таркибдаги асосий фигуралардан бири бўлди. Шу билан бирга, Матео Ковачич умумий машғулотларга қайтган, аммо ҳали ўйин амалиётини тўлиқ тиклаб улгурмагани учун таркибга киритилмади. Рико Льюис ҳам тўпиқ жароҳатидан кейин ўхшаш ҳолатда.

Сариқ карточка “мина”си: бир хато — жавоб ўйинисиз қолиш

Мадриддаги биринчи учрашувда ҳар икки жамоа футболчилари учун интизом масаласи ҳам жуда муҳим. УЕФА қоидасига кўра, гуруҳ босқичидан бошлаб учта сариқ карточка олган ёки кейинги ҳар қандай тоқ сонли огоҳлантиришга эга бўлган ўйинчи навбатдаги баҳсни ўтказиб юборади. Карточкалар фақат чорак финалдан кейин “тозаланади”.

“Реал” сафида дисквалификацияга яқин футболчилар: Жуд Беллингем, Винисиус Жуниор, Родриго, Дин Хейсен ва Орельен Тчуамени. Альваро Каррерас эса аллақачон тўртта огоҳлантиришга эга — яна биттаси уни автоматик четлатади.

“Манчестер Сити”да эса Нико О’Райли ва Савиони дисквалификациядан фақат битта сариқ карточка ажратиб турибди. Демак, “Этиҳад”даги жавоб баҳси учун ҳар бир дақиқа ва ҳар бир ҳаракат ҳисобда.

Ҳусанов масаласи: мухлислар бошланғич таркибни кутяпти

Абдуқодир Ҳусанов жорий мавсумда Чемпионлар лигасида тўрт баҳсда иштирок этди. 22 ёшли ҳимоячи “Наполи”, “Будё-Глимт” ва “Галатасарой”га қарши тўлиқ ўйнаган, “Байер” билан беллашувда эса 65-дақиқада алмаштирилган. “Реал” ва “Боруссия”га қарши ўйинларда захирада қолган, “Монако” ва “Вильярреал” билан тўқнашувларда эса жароҳат сабаб қайдномага киритилмаган.

Англия кубогида “Ньюкасл”га қарши ўта юқори савиядаги ўйиндан кейин, мухлислар ҳам, мутахассислар ҳам Ҳусановни “Реал”га қарши баҳсда бошланғич таркибда кўришни истаяпти. Бундай умидлар бекор эмас: ўтган мавсумда “Бернабеу”да ҳам у ишончли ҳаракат қилиб, Винисиус Жуниорга хавфли вазият яратиш имконини камайтиргани таъкидланади.

Энди энг асосий савол: “Бернабеу”даги бу янги кечада “Сити” ўз хотиржамлиги ва барқарорлигини яна бир бор кўрсата оладими? Жавобни майдон беради. Аммо бир нарса аниқ — бу баҳсда майда хато ҳам катта ҳисобга айланиши мумкин.