Туркиялик тадбиркорни ўз юртдошлари ўлдиргани фош бўлди
Ўзбекистоннинг Бухоро вилояти, хусусан, Қоровулбозор тумани ҳудудида туркиялик тадбиркорнинг ўлими билан боғлиқ жиноят иши тафсилотлари маълум бўлди, деб ёзмоқда Қалампир нашри.
Маълум қилинишича, хорижлик ишбилармон дашт ҳудудида ўлдирилиб, жасади ўша ернинг ўзида устига тупроқ тортиб яширилган. Энг муҳими, қотилликни содир этганлар бегона эмас — марҳумнинг ўз ватандошлари экани аниқланган.
Туркия фуқароси бўлган тадбиркорнинг жонсиз танаси 2025 йил 17 октябрь куни маҳаллий чорвадор томонидан топилган. Марҳум Туркияда бедарак йўқолгани ҳақида қидирувда бўлган 49 ёшли Қодир Тунч экани маълум қилинди.
Дастлабки тергов ҳаракатларида жасаднинг катта қисми чиригани ва марҳум пичоқ зарбалари оқибатида ҳалок бўлгани аниқланган. Суриштирувлар жараёнида ҳодиса жойидан ўтган автомобилнинг давлат рақами белгиланиб, ушбу машина Истанбул шаҳрида яшовчи 51 ёшли Суат Т. томонидан ижарага олингани маълум бўлган.
Автомобил кўздан кечирилганда ундан қон излари топилган ва олинган намуналар марҳумга тегишли экани тасдиқланган.
Шу асосда икки мамлакат ҳуқуқ-тартибот органларининг ҳамкорликдаги амалиёти доирасида Суат Т. ҳамда яна уч нафар гумонланувчи Истанбул шаҳрида қўлга олинган. Барча гумонланувчилар сўроқ жараёнида қотилликни содир этганини тан олган.
Терговда маълум бўлишича, Қодир Тунч ва Суат Т. Ўзбекистонда ресторан очиш режаси билан учрашган. Улар ўртасидаги келишмовчилик эса молиявий масала сабаб келиб чиққан. Суат T.нинг кўрсатмасига кўра, у шартнома учун Қодир Тунчга 20 минг АҚШ доллари берган, бироқ лойиҳа амалга ошмаганидан сўнг пулни қайтаришни талаб қилган.
Мазкур баҳс автомобил ичида жанжалга айланиб кетган. Муштлашув вақтида Қодир Тунч оғир тан жароҳати олган ва бироз вақт ўтгач вафот этган.
Гумонланувчилар жасадни катта йўлдан бироз ичкарига олиб кириб, чуқур қазишга улгурмаган ҳолда устига тупроқ тортиб ташлаб кетишган. Шундан сўнг улар Туркияга қайтиб кетган.
Қотилликдан кейин ижарага олинган автомобилни топшириш учун Суат Т. ўз танишларидан бирини Ўзбекистонга юборган. Тергов маълумотларига кўра, у шахс жиноят ҳақида хабардор бўлмаган.
Ҳозирда мазкур иш бўйича тўрт нафар гумонланувчига нисбатан жиноят иши судга оширилган. Тергов ҳаракатлари якунига етказилган.