Точилин: МОК қарори FIFA ва UEFAdаги бан масаласини ҳам силжитади
Футбол эксперти Александр Точилин «Евро-Футбол.Ru» нашрига берган эксклюзив интервьюсида FIFA президенти Джанни Инфантинонинг Россияга қўйилган тақиқни бекор қилиш ҳақидаги фикрлари, шунингдек, МОК яқин орада Россия спортига нисбатан барча санкцияларни олиб ташлаши мумкинлиги ҳақида тарқалган хабарларга муносабат билдирди. Бу ҳақда euro-football.ru хабар беради.
Точилиннинг айтишича, жаҳон ОАВлари МОКнинг Миландаги йиғилишида Россия спортига қўйилган чекловларни тез орада бекор қилиш бўйича принципиал қарор қабул қилингани ҳақида ёзмоқда. У бундай сценарий рўй беришига умид қилишини, бу мавзу анча вақтдан бери муҳокамада эканини таъкидлади.
Экспертнинг фикрича, Россиянинг изоляциядан чиқиши учун Европада ҳам аниқ сиёсий ирода керак. Шу билан бирга, у катта мусобақалар Россиясиз томошабоплик ва интрига жиҳатидан ютқазишини ташкилотчилар ҳам тушуниб турганини қайд этди.
Инфантино бир неча кун аввал Россия жамоаларига қўйилган банни олиб ташлаш тарафдори эканини билдириб, четлатишни мантиқсиз деб атагани ҳам Точилин эътиборидан четда қолмади. У бу баёнотни дунёдаги жараёнлар фонида табиий ҳолат сифатида баҳолаб, Россияга нисбатан икки хил стандартлар ва бирёқлама ёндошув кўринаётганини айтди.
Точилиннинг таъкидлашича, вақт ўтиши билан вазият ўзгаради ва тақиқнинг ўзи ҳам тобора «абсурд» кўринишга келмоқда. Унингча, буни футбол раҳбариятининг ўзи ҳам тушунмоқда.
МОК санкцияларни бекор қилса, бу FIFA ва UEFAdаги қарорларга ҳам таъсир қиладими, деган саволга Точилин аниқ жавоб берди: унинг фикрича, бу занжирли реакция бўлади. У ким биринчи бўлиб қадам ташлаши муҳимлигини, МОК каби йирик тузилма прецедент яратса, қолган ташкилотлар ҳам ўз позициясини қайта кўриб чиқишини таъкидлади.
Инфантинонинг келажакда жамоаларни сиёсат сабаб мусобақалардан четлатишни қонуний тарзда тақиқлаш кераклиги ҳақидаги ғоясига ҳам Точилин қўшилди. У спортнинг асосий шиори сиёсатдан холи бўлиши кераклигини, Россияга нисбатан қабул қилинган қарорлар эса бу тамойилга зид эканини эслатди.
ОАВларда FIFA апрел ойидаги конгрессда Россиянинг халқаро турнирларга тўлиқ қайтиши масаласини кўриб чиқиши мумкинлиги ҳақида ҳам хабарлар тарқалмоқда. Точилин бундай муддатларда қайтиш эҳтимолини инкор этмади ва бундай маълумотлар бекордан-бекорга пайдо бўлмаслигини айтди.
Шунингдек, у Россия қайта қўйиб юборилган тақдирда ҳам айрим жамоалар майдонга тушишдан бош тортиши мумкинлигини тан олди. Бундай вазиятда техник мағлубиятлар масалани тартибга соладими, деган саволга у ҳар бир ташкилотнинг ўз регламенти борлигини, у бузилганида интизомий чоралар қўлланиши шартлигини билдирди.
Точилиннинг фикрича, кимдир атайлаб ўйнашдан бош торца ва бунинг учун техник мағлубият ёзилса, бу бошқалар учун ҳам сигнал бўлади. У бундай демаршлар охир-оқибат ўша жамоаларнинг ўзига зарар келтиришини таъкидлади.
Елена Григорьевская