Энцо Фернандес "Реал"га интилаяпти: унинг ушбу орзуси руёбга чиқадими?

Лондоннинг «Челси» жамоасида тўп сураётган аргентиналик яримҳимоячи Энцо Фернандес келажаги бўйича катта қарорга тайёр турибди. Журналист Эдуардо Инданинг маълум қилишича, 25 ёшли футболчи фаолиятини Мадриднинг «Реал» клубида давом эттириш истагини яширмаяпти.

Манбага кўра, Энцо бу хоҳишини «Реал Мадрид» раҳбариятига очиқ етказган. Айтилишича, «қаймоқранглилар» либосида майдонга тушиш — аргентиналик футболчи учун оддий қизиқиш эмас, балки ҳақиқий орзу. Шунинг учун у Испания гранди вакилларига “мен шу ерда ўйнашни хоҳлайман” деган позицияни аниқ билдиргани қайд этилмоқда.

Аввалроқ ҳам «Реал»нинг жаҳон чемпиони бўлган футболчига эътибор қаратгани ҳақида турли хабарлар тарқалган эди. Энди эса гап-сўзлар янада “иссиқ”: футболчининг ўзи томонидан билдирилган хоҳиш бу мавзудаги муҳокамаларни янада жонлантириб юборди.

Энцо Фернандеснинг бу мавсумги рақамлари ҳам бефарқ қолдирмайди: у барча мусобақаларни қўшиб ҳисоблаганда 35 та ўйинда қатнашиб, 11 та гол урди ва 4 та голли узатма амалга оширди. Яъни у фақат марказда “ишчи куч” эмас, балки жамоанинг ҳужумчан фаоллигига ҳам таъсир қилаётган футболчи.

Тransfermarkt портали эса унинг бозор қийматини 85 миллион еврога баҳоламоқда. Бундай рақамда “арзон келишув” бўлмайди, албатта. Лекин «Реал» даражасидаги клублар баъзан нархга эмас, керакли деталга қараб қарор қилади — айниқса, ўйинчи ўзи ҳам келмоқчи бўлса.

Хулоса қилиб айтганда, Энцо “Мадрид орзуси”ни очиқ айтди. Энди энг қизиғи — бу орзу қоғозда қоладими ёки ҳақиқий трансферга айланадими? Футболда баъзан битта сигнал бутун бозорни қимирлатиб юборади — бу ҳозир худди шундай ҳолатга ўхшаяпти.