Январь ойи қаҳрамони ким бўлади? "Манчестер Сити"даги овозга қаранг...
“Манчестер Сити” расмий сайти яна бир ёқимли анъанани ишга туширди: бутун дунёга сочилиб кетган мухлислар овози орқали январь ойининг энг яхши ўйинчиси танланади. Бу шунчаки “кимни яхши кўрасиз?” деган сўров эмас — клуб ҳар бир номзоднинг ой давомидаги ҳақиқий ҳиссасини ҳам очиқлаб, танловни мазмунли қилаяпти.
2026 йилнинг биринчи ойи “Сити” учун жуда зич ўтди: тўртта турнир, тўққизта ўйин, турли босим, турли сценарий. Мана шу жадвалда уч футболчи алоҳида кўзга ташланди: Абдуқодир Ҳусанов, Бернарду Силва ва Жанлуижи Доннарумма. Улардан бири — ҳимояни тиклади, бири — ўйинни бошқарди, яна бири — дарвозани “қулфлади”. Энди эса мухлислар ҳал қилади.
Абдуқодир Ҳусанов
“Ланс”дан “Манчестер Сити”га кўчиб келганидан кейин бир йил ўтиб, ўзбекистонлик ҳимоячи “Этихад”даги фаолиятидаги энг ёрқин ойлардан бирини ўтказди. Гвардиола жамоасининг ҳимоя чизиғи асосий футболчилар жароҳатлари сабаб анча “силкиниб” қолган пайтда, айнан Ҳусанов майдонга туширилди. Ва кутилганидан ҳам зиёда натижа кўрсатди.
“Челси”га қарши 1:1 билан тугаган баҳснинг иккинчи бўлимида захирадан тушган 21 ёшли футболчи кейинги ўйинларда марказий ҳимояда доимий стартга айланди. Унинг тезлиги, жисмоний кучи ва техник тайёргарлиги уйғунлашган индивидуал ҳаракатлари мураббийлар ишончини ҳам, мухлисларнинг ҳурматини ҳам қозонди.
Ҳусанов учун январь ойининг боши ва охири, айниқса, эсда қоларли бўлди. Ой бошида “Брайтон”га қарши баҳсда у марказий ҳимояда дебютант Макс Аллейн билан жуфтликда ўта хавфли ҳужумга эга рақибга қарши ишончли ўйин намойиш қилди. Ой охирида эса Европа Чемпионлар лигасида “Галатасарой”га қарши сўнгги турда туркияликлар ҳужумларини бартараф этиш, айниқса Виктор Осимхенни тўхтатишда катта ёрдам берди. “Этихад”даги 2:0 ғалаба жамоани 1/16 финалга олиб чиқди — ва бу ерда Ҳусановнинг ҳиссаси жуда сезилди.
Бернарду Силва
Бу мавсум сардорлик боғичини таққан португалиялик яримҳимоячи яна “Сити”нинг асосий “мотор”ларидан бирига айланди. Техника, меҳнатсеварлик ва ғалабага чанқоқлик — Бернардунинг классик “комплекти”. Зич тақвимда у нафақат барқарор, балки илҳомли ўйинлари билан ҳам ажралиб турди.
У жамоа манфаатини биринчи ўринга қўядиган ҳақиқий жамоавий футболчи сифатида яна кўпчиликка намуна бўлди. Январдаги энг ёрқин кечалардан бири “Сент-Жеймс Парк”даги сафар ўйини бўлиб, у ерда Бернарду Лига кубоги ярим финалининг биринчи баҳсида “Ньюкасл” устидан 2:0 ҳисобида жуда муҳим устунликни таъминлашда катта роль ўйнади.
Яна бир муҳим жиҳат: Бернарду ижодкорликни ҳам кўрсатди. Аввал Лига кубогида “Ньюкасл”га қарши, кейин чемпионатда “Вулверхэмптон” устидан 2:0 ҳисобидаги ғалабада у янги ҳужумчи Антуан Семеньога икки ажойиб голли пас узатди. Қисқаси, Бернарду бу ойда ҳам “ўйинни улайдиган” футболчи бўлиб қолди.
Жанлуижи Доннарумма
Италиялик дарвозабон январь ойида яна бир бор нега дунёдаги энг кучли посбонлардан бири саналишини исботлади. Сокин, мувозанатли ва ишончли Доннарумма ҳимояда қўшимча барқарорлик берди — яъни ҳимоячиларнинг хатоси ҳам “қайта тикланадиган” даражага тушди.
Ой бошида “Этихад”да “Брайтон”га қарши 1:1 дурангда у бир нечта жон сақловчи сейвлар билан жамоани ўйинда ушлаб қолди. “Манчестер Юнайтед”га қарши дербида 0:2 мағлубият қайд этилган бўлса ҳам, Доннарумманинг ўйини ёмон бўлмади — баъзи вазиятларда ҳисоб янада оғирлашмаслигига айнан у сабабчи бўлди.
Январь эса энг яхши тарзда якунланди: кетма-кет икки “қуруқ” ўйин. Премьер-лигада “Вулверхэмптон”га қарши ва Европа Чемпионлар лигасида “Галатасарой”га қарши баҳсларда Доннарумма дарвозасини дахлсиз сақлаб қолди. Ҳар икки ўйин ҳам 2:0 ҳисобида “Сити” фойдасига ҳал бўлди — ва бу ерда дарвозабоннинг ҳиссаси жуда катта.
Энди эса гап мухлисларда
Уч номзод — учта турли куч: бири ҳимояда “соқчи”, бири марказда “дирижёр”, бири дарвозада “қалқон”. Қай бири январь қаҳрамони номига кўпроқ муносиб? Сўнгги қарор — овоз беришда.
Ушбу линк орқали ўзбекистонлик футболчига овоз беришингиз мумкин.