Шомуродов яна гол урди: "Башакшеҳир" "Ризеспор" билан дуранг ўйнади
Аввалги уч учрашувда ғалаба таъмини татиб кўрган «Башакшеҳир» бу сафар ҳам ўйинни ҳужумкор бошлади ва эрта гол билан мухлисларни қувонтирди. 19-дақиқада чап қанотдан йўлланган узатмани Элдор Шомуродов совуққонлик билан якунлаб, тўпни дарвоза тўрига жойлади — ҳисоб очилди.
Бироқ меҳмонлар ҳам таслим бўлиш ниятида эмасди. Биринчи таймга қўшиб берилган 45+1-дақиқада Таҳа Шаҳин аниқ зарба билан мувозанатни тиклади ва жамоалар танаффусга тенг ҳисоб билан чиқишди.
Иккинчи бўлимда майдонда “муроса” эмас, жанг кайфияти ҳукм сурди: ҳар икки томон хавфли ҳужумлар уюштирди, вазиятлар кескинлашди. Натижада жамоалар яна биттадан тўп киритди ва баҳс 2:2 ҳисобида якун топди.«Ризеспор» сафида Михай Михэйлэ (68’) гол уриб меҳмонларни олдинга олиб чиққан бўлса, «Башакшеҳир»нинг иккинчи голига Озгюр Йылдырым (74’) муаллифлик қилди.
Шу тарзда, 20 учрашувдан кейин 30 очко тўплаган истанбулликлар турнир жадвалида 6-поғонани эгаллаб турибди. 20 ўйинда 20 очкога эга «Ризеспор» эса 11-ўриндан жой олган.
Энг ёқимлиси — миллий жамоамиз сардори Шомуродовнинг тўпурарлик пойгасидаги барқарор юриши. Ҳужумчимиз 13 та гол билан "Трабзонспор"нинг нигериялик форварди Поль Онуачу билан бирга етакчилик қилмоқда. Демак, “Олтин бутса” учун уруш энди янада қизийди ва бу урушда Элдор ҳозирча жуда ишончли қадам ташлаяпти.
Туркия Суперлигаси. 19-тур
31 январ, «Фотиҳ Терим» стадиони
«Башакшеҳир» — «Ризеспор» 2:2
Голлар: Шомуродов (19’), Озгюр Йылдырым (74’) — Таҳа Шаҳин (45+1’), Михай Михэйлэ (68’)
«Башакшеҳир» — Муҳаммад Шенгезер, Жером Опоку, Леонардо Дуарте, Кристофер Опери, Омер Али Шаҳинер (с), Оливе Кемен, Аббосбек Файзуллаев, Элдор Шомуродов, Умут Гунеш, Амин Арит, Дэви Зелке.
Захира: Берат Оздемир, Онур Эргун, Онур Булут, Нуну Да Кошта, H.Гурелер, Якуб Калузински, Уссейну Ба, Иван Брнич, Доган Аламдар, Бертуг Йилдирим.