Трампнинг набираси Кай қўриқчиларидан шикоят қилди
АҚШ президенти Дональд Трампнинг 18 ёшли набираси Кай Трамп шахсий ҳаётидаги энг “оғир” муаммоларидан бири — хавфсизлигини таъминлайдиган қўриқчиларнинг доимий ҳамроҳлиги ҳақида очиқ гапирди. У бу ҳақда 76 миллион обуначига эга инфлуенсер Логан Полнинг Impaulsive подкастида айтди.
Кай суҳбат давомида ўз ҳаётида бўлаётган ўзгаришлар, оддий кундалик вазиятлар ҳам қай даражада бошқача тус ола бошлагани ҳақида тўхталди. Айниқса, Махфий хизматнинг узлуксиз назорати унинг эркинлигига таъсир қилаётганини яширмади: у қаерга бормасин, барибир қўриқчилар кузатувида.
“Бу жуда қийин. Улар ҳаётимда пайдо бўлгач, катта ўзгариш бўлди… Дўстларинг билан, бир гуруҳ қизлар билан вақт ўтказаётганингда, тахминан бир метр орқангда бир эркак турса, жуда ғалати туюлади”, — дейди Кай Трамп.
Унинг таъкидлашича, айнан шу назорат учрашувларда ҳам “кайфиятни бузувчи” омилга айланиши мумкин. Кайнинг сўзларига кўра, романтик учрашув пайтида агентнинг икки стол нарида ўтириши — инсонни табиий равишда ноқулай ҳолатга солади.
“Очиғини айтсам, бир йигит билан учрашувда бўлиб, у сендан икки стол нарида ўтириши чиндан ҳам ноқулай. Бу бироз ғалати. Лекин иложим борича бунга эътибор бермасликка ҳаракат қиламан”, — деди у.
Кай 2024 йилда бобоси Дональд Трамп президентликка сайлангач, бу ҳолатга маълум маънода мослашганини ҳам қўшимча қилди. У “диққатни жамлаб, қўриқчиларни гўё йўқдек тасаввур қилиш”га ўрганиб қолганини айтди.
Қизиғи, учрашувлардаги шунга ўхшаш “назоратли ҳаёт” Кайнинг ўзидан бир ёш катта амакиси — Баррон Трампда ҳам бор. У аёллар орасида машҳур экани ҳам тилга олинди. Page Six таблоидининг ёзишича, Дональд ва Меланиянинг ўғли учрашувга чиқиши учун гўёки Trump Tower биносининг бутун бир қавати текшириб чиқилган.
Кай эса ҳозирча оила қуриш ҳақида ўйламаётганини очиқ айтган. Унинг сўзларига кўра, онаси Ванесса Трамп доимо бир маслаҳатни такрорлайди: аввало карьера, кейин қолгани.
“Онам ҳар доим: ‘Карерангга эътибор бер. Уни йўлга қўйгач, кейин шу билан шуғулланасан’, дейди”, — дейди Кай.
Маълум қилинишича, Ванесса Трамп бир пайтлар модел бўлган, кейин эса беш фарзандни дунёга келтирган. Кай ҳам ўзи учун шунга ўхшаш йўлни кўраётганини, биринчи навбатда голфдаги карьерасини ривожлантириш, мусобақаларда ғалаба қозонишни мақсад қилганини таъкидлади.