АҚШ ҳарбий-денгиз кучлари Россия байроғи остидаги танкерни қўлга олди, Британия ёрдам берган
Россия Транспорт вазирлиги маълумотига кўра, АҚШ ҳарбий-денгиз кучлари ҳеч бир давлатнинг ҳудудий сувлари таркибига кирмайдиган очиқ денгиз ҳудудида “Маринера” танкерига чиқиш операциясини амалга оширган. Бу ҳақда podrobno.uz хабар беради.
Вазирлик билдиришича, америкалик ҳарбийлар бортга чиққанидан сўнг кема билан алоқа узилган.
Қайд этилишича, “Маринера” 2025-йил 24-декабрда Россия Федерацияси давлат байроғи остида сузиш учун вақтинчалик рухсат олган. Бу ҳужжат Россия қонунчилиги ҳамда халқаро ҳуқуқ нормаларига мувофиқ берилгани таъкидланган.
Россия томони БМТнинг 1982-йилги Денгиз ҳуқуқи бўйича конвенциясига кўра, очиқ денгизда кемалар қатнови эркинлиги режими амал қилишини эслатди. Унга кўра, бошқа давлат юрисдикциясида тегишли тартибда рўйхатдан ўтган кемаларга нисбатан куч ишлатиш ҳеч бир давлатнинг ҳаққи эмас.
Буюк Британия Мудофаа вазирлиги эса АҚШ ҳукумати сўровига биноан қироллик танкерини қўлга олиш бўйича операцияда кўмак берганини маълум қилди.
Ҳодиса тафсилотлари, шунингдек, экипажнинг қаердалиги бўйича ҳозирча қўшимча ахборот берилмаган.
Аввалроқ АҚШ Венесуэла нефти етказиб берилиши билан боғлиқ экани айтилаётган, Америка санкцияларини бузишда гумон қилинаётган нефть танкерини ушлаб қолиш ва эҳтимолий ҳибсга олиш бўйича кенг кўламли операция ўтказаётгани ҳақида хабарлар тарқалган эди. Россиянинг аралашуви ва Вашингтоннинг Венесуэла нефть секторига нисбатан сиёсати кескинлашгани фонида вазият халқаро майдонда резонанс келтирмоқда.