Котрина Кулбите кечаги 10:0 ҳисобидаги ғалабадан сўнг нималар деди?

Осиё Кубоги йўлидаги илк қадамни шонли ғалаба билан бошлаган Ўзбекистон аёллар терма жамоаси Шри-Ланкага қарши учрашувда рақибини тўлиқ мағлуб этди. Беллашув 10:0 ҳисобида якунланди ва терма жамоамиз нафақат натижа, балки ўйин сифати билан ҳам мухлисларда ижобий таассурот қолдирди.

Учрашувдан сўнг бош мураббий Котрина Кулбите журналистлар билан мулоқотда бўлиб, беллашув борасидаги фикрлари билан ўртоқлашди. Унинг таъкидлашича, бу ғалаба тасодиф эмас, балки жамоанинг пухта тайёргарлиги самарасидир.

“Қизларни чин дилдан табриклайман. Бу ютуқ уларнинг жонкуярлиги, интизоми ва ўзаро тушунишининг натижаси. Биз ушбу ўйинга жиддий тайёргарлик кўрдик. Шу боис, бундай йирик ҳисобни кутгандик. Лекин шу билан бирга, майдонда камчиликлар ҳам бор эди ва улар устида ишлашимиз керак”, — деди мураббий.

Кулбите айтишича, ҳар қандай рақибга қарши майдонга чиқишда жамоа нафақат ҳисоб, балки ўйин сифатига ҳам эътибор қаратади. Айниқса, жамоанинг ички стандартлари юқори ва улар ҳар бир учрашувни тажриба, синов, камчиликлар устида ишлаш учун имконият сифатида қабул қилади.

“Танаффусда футболчилар билан гаплашдим. Ҳисоб 5:0 бўлиб турганига қарамай, мен улардан янада юқори темп, аниқроқ паслар ва уйғунлик талаб қилдим. Бу фақат Шри-Ланкага қарши ўйин эмас — бу катта мусобақа учун қадам. Биз ҳар бир беллашувда ўйин сифати билан ажралиб туришимиз керак”, — дея қўшимча қилди Кулбите.

Мураббий, шунингдек, ҳакамлик ҳақида ҳам фикр билдирди. Унинг таъкидлашича, айрим вазиятларда қарорлар билан рози бўлмади, аммо умумий ҳисобда учрашув тинч ва яхши ўтди. “Футболда шундай пайтлар бўлади. Биз барибир ўз ўйинимизни кўрсатишга ҳаракат қилдик”, — деди у.

Илк ўйин кечаси, яъни қуёш ботгандан сўнг бўлиб ўтди. Бу, айниқса, ҳозирги иссиқ кунларда катта фарқ қилади. “Ҳа, об-ҳаво бироз қийинчилик туғдиради. Лекин футболчиларимиз бунга тайёр. Қуёшдан кейинги вақт ўйнаш учун нисбатан қулай. Бу албатта, +20 С^о эмас, аммо +35 С^о ҳам биз учун тўсиқ бўлолмади”, — дея кулди мураббий.

Эслатиб ўтамиз, терма жамоамиз навбатдаги учрашувни 2 июль куни Лаосга қарши ўтказади. Кулбите ва унинг жамоаси бугунги катта ютуқни ортда қолдириб, янада жиддий тайёргарликка киришмоқда. Асосий мақсад — Осиё Кубогида муносиб иштирок этиш ва ҳар бир ўйинда ўзбек футболининг юксак салоҳиятини намоён қилиш.