Капитолийга ҳужумнинг бир йиллигида Байден яна Трампни танқид қилди
![Капитолийга ҳужумнинг бир йиллигида Байден яна Трампни танқид қилди](https://gdb.rferl.org/bc5c0000-0aff-0242-89b3-08d9d122dd94_cx0_cy5_cw0_w800_h450.jpg)
АҚШ собиқ президенти Дональд Трампнинг бир гуруҳ тарафдорлари Конгресс биноси – Капитолийга ҳужум қилганига 6 январь куни бир йил тўлди.
Ҳужум қилганлар президент сайлови натижаларининг тасдиқланишига халал беришга уринишган эди. Сайловда ҳозирги президент Жо Байден Трамп устидан ғалаба қозонган. Ҳужум чоғида бир неча киши нобуд бўлган.
Кеча Капитолийда ўтказилган хайрия тадбирида иштирок этган президент Байден ҳамда вице-президент Камала Ҳаррис мазкур ҳужумни “демократияга ҳамла” деб атаганлар.
Байден Трампни қаттиқ танқид қилиб, уни ҳокимиятни топширишнинг демократик тартиб-таомилларига халал беришда, ўз тарафдорларини гижгижлашда ва кейин ҳужумни тўхтатиш учун ҳеч нарса қилмаганликда айблаган. Байден бунақа воқеа АҚШ тарихида илк бор юз берганини урғулаб, ҳужумни қуролли қўзғолонга менгзаган.
Ўтган йилнинг 6 январь куни Трамп ўз тарафдорлари қаршисида нутқ сўзларкан, сайлов натижаларини ҳеч қачон тан олмаслиги, уларни сохталаштирилган деб ҳисоблашини айтган эди. Шундан сўнг кўп ўтмай оломон депутатлар Байденнинг ғалабасини тасдиқлашга ҳозирлик кўраётган Капитолий биносига бостириб кирган. Трамп “Твиттер”да ҳужум қилганларни босиқликка чақирган, аммо уларнинг тажовузкорлигини қораламаган.
Ўша тартибсизликлар муносабати билан 720 дан ортиқ киши турли ҳуқуқбузарликларда айбланган, айримларига қамоқ жазоси тайинланган. Конгрессда Трампга импичмент эълон қилинган, аммо Сенатда уни қоралаш учун овозлар сони етишмаган.