Транспорт вазирлиги халқаро авиачипталарни сотиб олишга шошмасликни тавсия этмоқда
Вазирлик хабарига кўра, "яшил", "сариқ" ва "қизил рейслар"га ажратилган ҳолда мунтазам парвозларни қайта тиклаш устида хали ҳамон иш олиб борилмоқда.
Транспорт вазирлигининг хабар беришича, сўнгги кунларда ижтимоий тармоқлар ва интернет сайтларида айрим хорижий авиакомпаниялар жорий йилнинг 1 июль санасидан эътиборан Ўзбекистонга мунтазам парвозларни қайта тиклаши ва шу муносабат билан авиа чипталар сотуви бошлангани тўғрисидаги хабарлар тарқалмоқда.
Республика махсус комиссиясининг қарорига мувофиқ республика ҳудудида кучайтирилган санитария-гигиена назорати жорий йилнинг 1 августига қадар сақланиб қолиши белгиланган.
"Шу муносабат билан Транспорт вазирлиги томонидан хорижий давлатлар авиация маъмуриятларига Ўзбекистон Республикасига авиакомпанияларнинг мунтазам парвозларни амалга оширишга ҳали руҳсат берилмаганлиги тўғрисидаги ноталар юборилган", - дейилади Транспорт вазирлиги хабарида.
Айни дамда Республика махсус комиссиясининг қарорига мувофиқ санитария-эпидемиологик вазият барқарор бўлган ҳамда коронавирус инфекцияси билан касалланиш ҳолатлари камайган мамлакатлар билан "яшил", "сариқ" ва "қизил рейслар"га ажратилган ҳолда мунтазам парвозларни қайта тиклаш устида иш олиб борилмоқда.
"Йўловчиларга эслатиб ўтамиз, турли авиакомпанияларнинг Ўзбекистонга мунтазам парвозларни бошлаши тўғрисида тарақалаётган расман тасдиқланмаган хабарларга ишониб авиачипталарни сотиб олманг. Мунтазам рейслар тиклангунга қадар фақат Республика махсус комиссияси томонидан тасдиқланган парвозлар жадвалига мувофиқ чартер рейсларигина амалга оширилади", - деб таъкидланмоқда.