Тошкент милицияси аҳолини ижтимоий тармоқлар ва мессенжерларда тарқалган хабарларга ишонмасликка чақирди
ЎзАнинг хабар беришича, бунга ижтимоий тармоқлар ва мессенжерларда нотаниш аёл суратга олиб қўйиш баҳонасида Яшнобод туманидаги 166-мактаб олдида учинчи синфда ўқийдиган икки қизни машинага чақиргани, бунинг оқибатлари ёмонлик билан тугаши мумкин бўлгани тўғрисида тарқатилган аудио сабаб бўлган. Аудио 3-синф ўқувчисининг онаси томонидан ёзилгани айтилган.
Хабарда таъкидланишича, Тошкент милицияси бу маълумотни текширди. Милиция ходимлари мактаб атрофида ўрнатилган кузатув камераларини текширган, мактаб ўқитувчилари, ўқувчилари ва уларнинг ота-оналари билан суҳбат ўтказган. Текширув натижасида бундай ҳодиса юз бермагани аниқланган.
“Ота-оналар билан суҳбат давомида ушбу аудиони Тelegram’даги гуруҳларга тарқатган икки она аниқланган. Улардан бири ушбу аудио Россия Федерациясининг Астрахан шаҳрида яшовчи танишидан, иккинчиси Сергели туманида яшовчи ўртоғидан келганини айтган”, дейилади хабарда.