Татарстан районнарына кара каргалар килде
Татарстанда кошларның язгы миграциясе башланды. Күк йөзендә һәм гадәти оя кору урыннарында әлегә «күзәтче» кара каргалар очрый, алар төп көтүдән алдарак килә, дип хәбәр итә ТР Биоресурслар буенча дәүләт комитеты матбугат хезмәте.
Бу кошларны Чүпрәле, Кама Тамагы, Спас һәм Чистай районнарында күргәннәр инде. Якын арада кошларның күпләп килүе көтелә.
Күчмә кошлар һава торышының үзгәрүен сизә. Якын көннәрдә төнге салкыннар кимү һәм тәүлекнең якты вакытында температураның ышанычлы күтәрелүе көтелә.