Муса Җәлилнең 120 еллыгына «Гомерем минем моңлы бер җыр иде...» әдәби кичә оештырылды

Роберт Миңнуллин исемендәге Республика балалар китапханәсе Советлар Союзы Герое, Ленин премиясе лауреаты Муса Җәлилнең 120 еллыгы уңаеннан «Гомерем минем моңлы бер җыр иде...» дип аталган әдәби кичә уздырды.

Китапханәнең Милли әдәбият һәм туган якны өйрәнү бүлеге мөдире, филология фәннәре кандидаты Нуридә Насыйбуллина Казан шәһәре Яңа Савин районы 155нче гимназиясенең 8нче сыйныф укучыларын герой-шагыйрьнең тормыш юлы һәм иҗаты белән таныштырды.

Чарага галим, тарих фәннәре докторы, профессор Гамирҗан Дәүләтшин чакырылган иде. Ул – Татарстан фәннәр академиясе Галимҗан Ибраһимов исемендәге Тел, әдәбият һәм сәнгать институтының Язма мирас үзәгендә сакланган Муса Җәлил фондын тасвирлаучы галимнәрнең берсе. «Гамирҗан Миргаҗан улы Мирасханәдә Муса Җәлилнең 10нчы фонд астында сакланучы кулъязма мирасы белән таныштырды. Герой иҗатына кагылышлы кызыклы мәгълүматлар белән уртаклашты», – диде «Татар-информ»га Нуридә Насыйбуллина.

Аның әйтүенчә, ел дәвамында «Җыр өйрәтте мине хөр яшәргә...» дип аталган әдәби күргәзмә – почмак эшләячәк. «Биредә шагыйрьнең тәрҗемәи хәле, халыкка аеруча киң танылган әсәрләре (татар, рус, инглиз телләрендә), аның тормышы һәм иҗаты турындагы мәкаләләр, шулай ук герой-шагыйрь турында әйтелгән фикерләр, аңа багышлап язылган шигырьләр, сценарийлар, Муса Җәлил әсәрләре һәм аның хакындагы әдәбиятның биобиблиографик күрсәткече урнаштырылган. Фотоархив әдипнең гаилә фотосурәтләре, аның әсәрләре буенча куелган һәм аңа багышланган спектакль күренешләре белән таныштыра», – диде ул.

«Муса Җәлил сүзләренә язылган җырларга, герой-шагыйрь образын чагылдырган сәнгать әсәрләренә дә урын бирелгән. Шулай ук шагыйрь иҗатын өйрәнүче галимнәрнең фәнни хезмәтләре дә киң катлам укучыга тәкъдим ителә. Муса Җәлилнең ялкынлы иҗаты, каһарманлыгы халкыбыз күңелендә һәм тарихында мәңге саклана», – диде Милли әдәбият һәм туган якны өйрәнү бүлеге мөдире.