Володин 1 февральдән социаль түләүләрнең артуы турында искәртте

1 февральдән Россиядә 40 тан артык социаль түләү һәм пособие 5,6 процентка индексацияләнде. Моның өчен барлык кирәкле акчалар бюджетка салынган, дип белдерде Дәүләт Думасы Рәисе Вячеслав Володин. Бу хакта «Российская газета» яза.

«Түләүләр, пособиеләр һәм компенсацияләр алдагы ел өчен куллану бәяләренең факттагы индексыннан чыгып арта. Социаль йөкләмәләрне үтәү өчен барлык кирәкле чаралар федераль бюджетта каралган», - дип аңлатты ул.

Ана капиталы суммасы артты. Беренче бала туганда гаилә 729 мең сумга якын һәм икенчесе туганда тагын 234,3 мең сумга исәп тота ала. Шул ук вакытта, әгәр гаилә беренче балага сертификат алмаган булса, икенчесе туганда аңа 963,2 мең сум түләнә.

Бала туганда бер тапкыр бирелә торган пособие 28,5 мең сумга кадәр диярлек арттырылган. «Герой-ана» исеменә лаек булган хатын-кызларга түләүләр 76,5 мең сум тәшкил итәчәк. Инвалид һәм балачактан I төркем инвалид балаларны карау буенча компенсация түләүләре һәм балалы гаиләләргә башка күп кенә түләүләр үсәчәк.

Шулай ук индексация Бөек Ватан сугышы һәм сугыш хәрәкәтләре ветераннары, Россия Геройлары, Хезмәт Геройлары, барлык өч төркем инвалидларга айлык акчалата түләүләргә кагыла.

«Балалы гаиләләргә, булачак әниләргә, күп балалы ата-аналарга, сугыш хәрәкәтләре ветераннарына, өлкәннәргә һәм мөмкинлекләре чикләнгән кешеләргә ярдәм итү - дәүләт сәясәтенең үзгәрешсез өстенлеге», - дип билгеләп үтте Дәүләт Думасы Рәисе.