Төмәннән Банисә Ниязова: «Татар теле - халкым теле» иҗади конкурсында тәҗрибә тупладык

Төмәннең «Яңарыш» газетасында Римма Умитбаеваның «Бәйге, семинар уңышлы үтте» дигән язмасы чыкты.

«Чувашия Республикасында урнашкан «Сәләт-Батыр» яшьләр иҗтимагый үзәгендә татар теле һәм әдәбияты укытучылары өчен Бөтенроссия «Татар теле - халкым теле» иҗади конкурсы һәм семинар узды. Конкурс һәм семинар Татарстан Республикасы мәгариф һәм фән министрлыгы, Чувашия Республикасы Батыр муниципаль округы администрациясе, Бөтендөнья татар конгрессы, «Сәләт» яшьләр үзәге тарафыннан оештырыла.

Конкурста Россия Федерациясенең 13 төбәгеннән, Татарстан Республикасының 20гә якын районыннан татар теле һәм әдәбияты укытучылары катнаша. Тубылның танылган татар теле һәм әдәбияты укытучысы, «РФ гомуми белем бирүнең мактаулы хезмәткәре», «Һөнәренә тугрылык өчен» күкрәк билгесе иясе, 15 нче мәктәп укытучысы Банисә Ниязова да бу бәйгедә катнашып Лауреат дипломы белән бүләкләнеп кайтты.

Ул бу бәйге һәм семинар турында үзенең фикерләре белән уртаклашты: «Бәйге Бөек Ватан сугышы ветераны, 48 ел балаларга белем биргән, легендар укытучы Шәүкәт Сөләйманов истәлегенә багышланды. Бәйгедә катнашучыларны җылы каршы алдылар. Укытучыларны Бөтендөнья татар конгрессы Башкарма комитеты рәисе Данис Шакиров котлады. Ул, татар теле әдәбияты укытучылары безнең таянычыбыз, терәгебез, дип конкурста катнашучыларга уңышлар теләде. Безне ТР рәисе ярдәмчесе, ТР «Алдынгылар хәрәкәте»нең республика бүлеге советы җитәкчесе Тимур Сөләйманов, ТР мәгариф һәм фән министрлыгының төбәкара бүлек җитәкчесе Гөлия Мусина сәламләде. Чарада 100гә якын укытучы катнашты.

Беренче читтән торып катнашу этабында мин автобиографиямне, эссе, резюме, дәрес эшкәртмәсен яздым, татар халык иҗаты, татар халкының гореф-гадәтләре буенча уен форматында татар телен өйрәнү сценариен җибәрдем. Бу бәйге буенча биш җиңүче конкурска һәм семинарга чакырылдылар. Бәйгегә һәр катнашучы да остаханәләрдә үз проектлары белән чыгыш ясадылар.

Финал этабы, бүләкләү чарасы Чувашиянең Батыр муниципаль районы Кызыл Чишмә авылында узды. Без «Татар теле йолаларда яши, уеннарда чарлана» темасына багышланган ачык дәресләр үткәрдек. Беренче Бөтенроссия «Татар теле - халкым теле» иҗади конкурсының җиңүчеләре Чувашиядән, Чүпрәледән, Марий Эл Республикасыннан, Казан шәһәренең 183 гимназиясеннән булдылар.

Конкурс йомгаклары буенча укытучыларның иң яхшы эшләре, дәрес сценарийлары, эсселары электрон җыентыкта басылып чыга. Без – укытучылар өчен бай, эчтәлекле программа әзерләнгән иде: остаханәләрдә катнаштык, тәҗрибә тупладык. Татар теле һәм әдәбияты укытучылары өчен һөнәри осталыкларын үстерү, тәҗрибә уртаклашу өчен яхшы мөмкинлек булды. Оештыручыларга, коллегаларыма рәхмәтләремне белдерәм», - дип сөйләде.