Песков: Россия Израиль һәм Палестина арасында ике дәүләтле чишелеш яклы
Россия Израиль белән Палестина арасындагы конфликтны ике дәүләтле чишелеш юлы белән җайга салырга кирәк дип саный. Мондый позиция эзлекле һәм транспарент булачак, дип сөйләде РФ Президентының матбугат сәркатибе Дмитрий Песков. Элегрәк журналистлар белән очрашу вакытында аннан Европа илләренең Палестинаны тану нияте турында сорадылар.
Россия – ул СССРның хокукый варисы, ә Советлар Союзы таркалырга берникадәр вакыт кала Палестинаны таныды, дип искәртте ул.
«Бу Берләшкән Милләтләр Оешмасының Иминлек советы резолюцияләренә һәм ике дәүләтле чишелеш юлына тулысынча туры килә. Шуңа күрә без СССРның хокукый варисы булып калабыз һәм бу өлкәдә эзлекле һәм транспарент позициябезне дәвам итәбез», - дип Кремль вәкиле цитатасын китерә ТАСС.
Элегрәк Испания, Норвегия һәм Ирландия Палестинаны дәүләт буларак тану турында хәбәр ителде. Норвегия Палестинаны дәүләт буларак 2024 елның 28 маенда ук рәсми рәвештә таныячак.
Шулай ук «европалылар» арасында Палестинаның бәйсезлеген Болгария, Венгрия, Кипр, Польша, Румыния, Словакия, Чехия һәм Швециядә таныдылар. Гомумән алганда, Берләшкән Милләтләр Оешмасының 193 иленнән 143 иле, шул исәптән Россия дә, Палестинаның бәйсезлеген таный.