Миңнеханов: Чистай районындагы ферма кебек проектлар авылда эш урыннары булдыра
Чистай районындагы терлекчелек комплексы кебек проектлар авылда эш урыннары булдыра. Бу хакта Татарстан Республикасы Рәисе Рөстәм Миңнеханов быел файдалануга тапшырылган корпусларда булганнан соң үзенең телеграм-каналында язган.
«Фермада 2 000 баштан артык мөгезле эре терлек бар, терлек саны даими рәвештә яңартыла. Мондый проектлар ярдәмендә республикада терлек саны арта, яңа эш урыннары булдырыла!» – дип ассызыклаган төбәк җитәкчесе.
2024 елда файдалануга тапшырылган терлекчелек биналары ике корпустан тора. Һәркайсы 400 баш терлеккә каралган. Моннан тыш 150 баш терлеккә каралган бозау абзары бар. Фермада 73 эш урыны булдырылган. Сәфәр барышында Рәискә сыер абзарларын, саву залларын күрсәткәннәр, технологик процесс турында сөйләгәннәр.
Рөстәм Миңнеханов бүген эш сәфәре белән Чистай районында булды. Терлекчелек комплексыннан тыш, ул 5 гектарлы яшелчә саклагычын карады һәм язгы кыр эшләре барышын бәяләде.