«Дулкын» татар мәдәнияте үзәге Алтайда татар халкы тарихы турында сөйләде
Алтай крае «Дулкын» Татар мәдәнияте үзәге» иҗтимагый оешмасы Халыклар бердәмлеге көненә багышланган чараларда катнашты. Бу хакта Бөтендөнья татар конгрессы матбугат хезмәте хәбәр итә.
1 ноябрьдә Алтай крае балалар китапханәсендә Надежда Крупская исемендәге Алтай дәүләт педагогия университетының Педагогика һәм психология институтының 2 курс студентлары белән очрашу узды. Китапханәнең зур залында «Дулкын» Алтай крае иҗтимагый оешмасы рәисе урынбасары Артем Зиннәтуллин чыгыш ясады. Булачак укытучылар Россиядә һәм Алтайда татар халкы тарихы һәм мәдәнияте турында белә алды. Аралашу барышында үзара сораулар һәм җаваплар да булды.
3 ноябрьдә Марк Юдалевич исемендәге 20 нче китапханә филиалында «Халыклар дуслыгында – Россия бердәмлеге» түгәрәк өстәле узды. Очрашуның исеме бәйрәмнең үзенә туры килә һәм Алтай краенда 140тан артык халык һәм милләт вәкилләренең тынычлыкта һәм татулыкта яшәү өчен барлык шартлар тудырылганлыгын күрсәтергә тиеш иде.
«Дулкын» оешмасы активистлары милли баш киемнәре, Алтай крае татар педагоглары һәм төбәктә татар җәмгыяте формалашуы турында сөйләде. Шулай ук очрашуда катнашучылар өчен «Дуслар» ансамбле башкаруында җырлар яңгырады.
«Түгәрәк өстәл» эше нәтиҗәләре буенча мәдәни-тарихи мирасны саклау максатыннан яшьләр өчен даими рәвештә шундый чаралар үткәрү турында карар кабул ителде, диелгән хәбәрдә.