Рөстәм Миңнеханов һәлак булган хәрбиләрнең исемен мәңгеләштерүне контрольгә алырга кушты
Рөстәм Миңнеханов традицион республика киңәшмәсендә төбәк муниципалитетлары башлыкларына махсус хәрби операциядә катнашып һәлак булучылар истәлеген мәңгеләштерүне контрольгә алырга кушты.
«Район, шәһәр башлыкларына һәлак булган барлык ватандашларның истәлеген мәңгеләштерүне аерым контрольгә алуны йөклим. Яшь буын илебезне яклап үз гомерләрен биргән кешеләрне белергә һәм онытмаска тиеш», – дип белдерде республика җитәкчесе.
Миңнеханов билгеләп үткәнчә, 2022 елда «республикабызның меңгә якын патриоты» «Алга» һәм «Тимер» дигән исемле батальоннарга хезмәт итәргә киткән, ә тагын «ун меңнән артыгы» өлешчә мобилизация кысаларында Кораллы көчләргә чакырылган.
«Төрле подразделениеләрдән 200дән артык татарстанлы вафатыннан соң Батырлык ордены белән бүләкләнде. Һәм, әлбәттә, безнең республикада туган дүрт кеше Россия Геройлары булды. Без Ватаныбыз хакына үз гомерләрен биргән хезмәттәшләребезне онытмаска тиешбез», – дип йомгаклады ул.
Рөстәм Миңнеханов махсус хәрби операциядә катнашучыларга һәм аларның гаилә әгъзаларына ярдәм оештыруны контрольдә тотуны да көчәйтергә кушкан иде.