Миңнеханов белән Мурашко Дәрвишләр бистәсендә 6нчы балалар хастаханәсе филиалын ачты
Балалар хастаханәсе филиалы торак массив эчендә төзелгән, анда пациентларга уңайлы булсын өчен шартлар тудырылган: уен бүлмәләре, буфет, иркен берничә холл, ана белән бала бүлмәләре булган көтү зоналары. Шулай ук хәрәкәтләнү мөмкинлекләре чикле булган гражданнар төркемнәре өчен барлык шартлар да оештырылган.
Дмитрий Шатров / «Татар-информ»
«Бу – федераль коллегаларыбыз белән бергә республикада гамәлгә ашыра торган обьектларның берсе. Алар шактый күп, без илебез Президенты Владимир Путинга һәм Хөкүмәт Рәисе Михаил Мишустинга чын күңелдән рәхмәтле. Без сөйләрлек, горурланырлык нәрсәләр бар, Михаил Мишустинның барлык үгет-нәсихәтләрен кабул иттек һәм техник күрсәткечләргә ирешәчәкбез», – диде Татарстан Рәисе.
Рөстәм Миңнеханов Россия Сәламәтлек саклау министры Михаил Мурашко белән бергә хастаханәне карап чыкты.
Дмитрий Шатров / «Татар-информ»
«Балалар сәламәтлегенә мондый игътибар бирелү бик күңелле, һәр атна саен балаларга ярдәм күрсәтә торган яңа медицина оешмалары ачыла. Алар – реабилитация үзәкләре, стационарлар, ә бүген – поликлиника», – диде ул.
Ул билгеләп үткәнчә, илдә балаларга күрсәтелә торган ярдәм белән бәйле хәл бик нык үзгәрде.
«Бала дөньяга аваз салуга ук, тумыштан һәм нәселдән килә торган авыруларны ачыклау өчен махсус тестлар бик күп ясала. Бүгенге көндә без – яңа туган сабыйларга шундый күп санлы тестлар үткәрә торган беренче ил», – дип өстәде ул.
Хастаханә көненә 180 кешене кабул итә алачак. Ул 11,5 мең балага хезмәт күрсәтәчәк, медицина учреждениесе иң заманча җиһазлар белән җиһазландырылган.
Хастаханәдә йогышлы чирләр блогы, 10 урынлык көндезге стационар, лаборатория, реабилитация чаралары үткәрү өчен зал каралган. Поликлиника базасында тәүлек әйләнәсе травматология пункты эшли.