Казан консерваториясе «Башмагым» музыкаль комедиясенә чакыра
Казан консерваториясе 27 апрельдә «Башмагым» музыкаль комедиясенә чакыра. Концерт 18:30 сәгатьтә башлана. Спектакль татар телендә.
«Сәйдәшев исемендәге дәүләт зур концертлар залында Татар музыкасы, шигърияте һәм театры фестивале тәмамлану уңаеннан Җәүдәт Фәйзинең «Башмагым» легендар музыкаль комедиясе күрсәтеләчәк», дип хәбәр итә Казан консерваториясенең матбугат үзәге.
«Башмагым» спектакле – яңартылган куелыш. Казан консерваториясенең Опера студиясе әлеге әсәрне беренче тапкыр 2009 елда куйды. Казан консерваториясе куйган спектакль премьерасыннан соң инде 13 ел узды. Тамашачыларны яңа буын музыкантлары, артистлары белән очрашу көтә», - дип ассызыклый Казан консерваториясенең музыкаль театр кафедрасы мөдире, Татарстан Республикасының атказанган сәнгать эшлеклесе, профессор Әлфия Җәббарова.
Татарстанда быел – Милли мәдәниятләр һәм гореф-гадәтләр елында – Казан консерваториясенең Туган тел көненә багышланган Татар музыкасы, шигърияте һәм театры фестивален оештыруы – аерым әһәмияткә ия вакыйга, диелә хәбәрдә.
Фестивальнең сәнгать җитәкчесе – Казан консерваториясе ректоры, профессор Вадим Дулат-Алиев.
Фото: © Казан дәүләт консерваториясенең матбугат үзәге