Татарстанда 1,5 меңгә якын студент эшче белгечлекләрен бушлай үзләштерә
Татарстанда студент отрядлары өчен һөнәри белем бирүнең язгы этабы башланды. Республиканың 1,5 меңгә якын студенты эшче белгечлекләре буенча өстәмә һөнәр үзләштерәчәк һәм шуның белән алга таба эшкә урнашуга гарантия алачак.
Укучыларга 61 белгечлек (электромонтер, ташчы, юл эшчесе, официант, тракторчы-машинист, сыйфат контролеры, эретеп ябыштыручы, слесарь, монтажчы, тегүче һ.б.) үзләштерергә тәкъдим итәләр. Әлеге максатларга федераль бюджеттан 19 миллион сумнан артык акча бүленгән. Бу хакта ТР Мәгариф һәм фән министрлыгының матбугат хезмәте хәбәр итә.
Укыту Казан, Әлмәт, Түбән Кама, Буа һәм республиканың башка торак пунктларындагы 25 учреждениедә оештырыла.
Быел һөнәри белем программасын студент отрядларының 35 меңнән артык катнашучысы үзләштерәчәк.
Искәртеп узабыз, студентларга гына түгел, теләге булган башка кешеләргә дә бушлай белем алу мөмкинлеге тудырыла – ул «Демография» илкүләм проекты буенча үткәрелә. Узган ел 9 меңнән артык кеше белем алган, аларның 92 проценты эшкә урнашкан.
Россиядә илкүләм проектлар РФ Президенты Владимир Путин күрсәтмәсе белән 2019 елдан гамәлгә ашырыла.