Леонов: Казан – спорт ягыннан Европаның иң яхшы шәһәре, без Олимпиада кабул итә алыр идек
Татарстанның спорт министры Владимир Леонов Казанның җәйге Олимпиада кабул итә алуын белдерде. Аның сүзләренчә, Татарстан башкаласы дүртьеллыкның төп спорт турнирын быел ук уздыра алыр иде.
«Казан хәзерге вакытта спорт инфраструктурасы ягыннан - Европаның иң яхшы шәһәре. Без җәйге Олимпия уеннарын быел ук та яки киләсе елда да проблемаларсыз үткәрә алабыз. Бездә моның өчен барысы да бар», – диде Леонов «Матч ТВ» телеканалындагы «Что по спорту?» тапшыруында.
Исегезгә төшерәбез, киләсе җәйге Олимпия уеннары Франциядә (Париж, 2024), АКШта (Лос-Анджелес, 2028) һәм Австралиядә (Брисбен, 2032) узачак.
Шунысын да билгеләп үтәргә кирәк, хәзерге вакытта Казанда Махсус Олимпиаданың Бердәм уеннары уза. Ярышлар 27 гыйнварга кадәр дәвам итәчәк.